\id GAL  - Abau NT [aau] -Papua New Guinea 2006 (DBL -2014) 
\h GALESIA 
\toc1 Pol so mamey, sios Galesia mon ma lwak se ma mey kow ha hok non 
\toc2 Galesia 
\toc3 Ga 
\mt1 GALESIA  
\mt2 Pol so mamey, sios Galesia mon ma lwak se ma mey kow ha hok non  
\ip \bd Meyamey uwr hokwe:\bd* Aposel Pol.  
\ip \bd Yier hiy ma lwayr meyamey hokwe:\bd* Hiykwe yier perey lwak se po meyamey pak e, nonkway lopa.  
\ip \bd Enekwei hiy ma meyamey hokwe:\bd* Hiykwe enekwei Yia 48 sok po meyamey kow pak, Yia 49 sok po meyamey kok pak, Jisas hiy ma lokrue so meyki.  
\ip \bd Ok mamey mon ma lwak mokwe senkin:\bd* Enekwei Pol hiy hyo lanio mesor nok mey kreys-kamon mo peyr-ar ko ke ma meio pie hokwe, hiykwe God so ok-ihey kokwe uwrsa Galesia mon ma lwayr me mesor kow. Enekwei haraw-aw hiy ma kiy-okriy hain so meyki hokwe sawk, nan kiykiy-ay uwr orhey non Juda ko hom le-nene nok, senkin me, “Kristen uwrkayn irweyk homkwe Moses so sow-mawk mo ouon mon lwak e.” Aposel Pol hiykwe Juda uwr hom ok senkin sokwe ma hiy-mesor sokwe kar ley pa. Sa hiykwe senkin sehe meyamey. Enekwei Abraham hiy ma lwak hokwe, hiykwe sow lopa lwak, payhokuaw, God hiykwe sow-mawk mokwe peyr Moses se kokwe kow pa. Mo Abraham hiy sow lopa lwak liok, hiykwe God so ok-ihey ke nan kiykiy-ay, sa God hiykwe hye sehe me-huonok prosue. Uwrkayn irweyk hom seyn, homkwe God so ok-ihey ke-aw liy nan kiykiy-ay. Seyr hme kokwe Juda mo sow ouon mon lwak e liy me-sasay ley.  
\ip \bd Pol so uron ko hokwe senkin:\bd* Pol hiykwe God so okar-ok ke hiy-ono sous-a-sous kraiay, senkin: uwr hokwe hiy Krais se ma nan kiykiy-ay se hokuaw kokwe, God so maym hokwe hye liy huonok prosue. Hiymon sorasor irweyk irweyk hrom Juda mo sow mo ouon mon lwak e ma me mokwe, God so ok ko meykyay mon ley-ney-ney. Hreme luw-luw-aw God so nene mon ma mon wak hokwe, mo Hakamay se ma nan kiykiy-ay hiykwaw-aw, yerki har lopa.  
\c 1  
\s1 Pol so peyrmawk-ok  
\p
\v 1 Mamey okukwe ha Pol hiy mey. Hakwe aposel, hane kokwe uwr prueyn hiy me-ha pa, seyr hano mey kokwe uwr prueyn ki ko hiy me-iaup pa. Sawk ha aposel-mey ma meio ohokwe, hane kokwe Hakamay Jisas Krais o, Aio God, Jisas se lokrue ko se ma me-sian o, hohkiaw kow.  
\v 2 Seyr ha o, hano kristen-wayh, hane nion ma non-wak o, hromkwe mamey okukwe sios lowpwarowp kipay Galesia mon ma lwak me mey kow.   
\p
\v 3 Hromo Aio God o, hromo Hakamay Jisas Krais o, hmekwe maym-kow-yor o, liwak marowhway yor o, seme ka kow.   
\p
\v 4 Hreme ki ohiy so enekwei piap-araw so iha ko se ma kahya huonok prosue ey hokwe, Krais hiykwe hiykiaw-ayay po kow okrue, hromo yor piap-araw me hokuaw kokwe. Hiykwe senkin sehe mon, hiykwe Aio God so uron arian so meyki pyay. \x * \xo 1:4 \xt Ga 2:20\x*  
\v 5 Panpaniowni hokwe God so mon senkinaw ka nuw-wak peyow peyow. Okar.   
\s1 God so ok-ihey kokwe irweyk eyn peie kankoum sor o  
\p
\v 6 Hano uron hokwe yor, hom ma mon seme kiynuw-preiryay. Payhokuaw, hmo nan kiykiy-ay yor kokwe enekwei meipey lwak pa, sawk homkwe God, hme Krais so maym kow yor non ma me-huonok prosue se po saw-okriy hain. Sawk homkwe ok irweyk, hom ok-ihey-ok ma me ke lonuayk nakruok.  
\v 7 Sawk okar kokwe senkin, ok kamon, ok-ihey ke hieyn ma lwak kokwe korey lwak pey. Hakwe senkin sehe me, payhokuaw, uwr har homkwe hme ok kamon, God so ok-ihey ke hieyn non po mon way-sowp-a-sowp, seyr ok-ihey Krais se ma mesor ke okrei-ok ke hieyn, irweyk eyn po ma-kanhre mesor. \x * \xo 1:7 \xt Ap 15:1,24\x*  
\v 8 Sawk yor, ok-ihey irweyk eyn ke ma mesor, ok-ihey hrom ma mesor ko liy-liy-aw ma lwak lopa ke, mo hakiaw mesor hi, mo ensel nonkumey ko hiy mesor hi, uwr senkin sohokwe ka hruo yay kow. \x * \xo 1:8 \xt 1 Ko 16:22\x*  
\v 9 Ama, ok somokwe hromkwe mo papo me, sawk pokon kokwe hakwe liy-liy-aw makiy-me ey: Sawk uwr prueyn hme ok-ihey irweyk eyn ke posokwaw mesor kow e, ok-ihey hom peyr-mon ma lonuayk pie ko liy-liy-aw-ar ma lwak lopa ke, uwr senkin sohokwe ka hruo yay kow.   
\p
\v 10 Hmey, ok ha ma kiy-me sokukwe, hakwe uwrsa, hom hane uron yaprue nan e me pak? Korey law-ar. Hano uron ipey-ar hokwe, God hiy hane uron yaprue lira nan e! Hano uron, uwrsa me kar mon ey e nan hokwe, hakwe Krais so mey-uwr liy lwak ley. \x * \xo 1:10 \xt 1 Te 2:4\x*   
\s1 Pol hiy aposel-mey ma meio hokwe, God hiykiaw me-iaup  
\p
\v 11 Hano wayh-om, hakwe hom senkin nonkway e mon, God so ok-ihey, ha hme ma mesor kow okukwe, iwar hom mon ousne pa. \x * \xo 1:11 \xt Mat 16:17\x*  
\v 12 Ok-ihey sokukwe hane kokwe iwar prueyn hiy mesor kow pa, seyr tisa prueyn hiy hiymon sorasor pa. Sawk ok sokukwe hane kokwe Jisas Krais hiykiaw nuw-ousne hrahra ha mesor kow.   
\p
\v 13 Homkwe hano yor paraw-uh mokwe po lonuayk, ha Juda mo sow senkin senkin mo meyki ma pyay hokwe. Seyr homkwe po nonkway, ha God so sios me yor piap-araw non ma mon yorpayor piapay mon okrue liok mokwe. \x * \xo 1:13 \xt Ap 8:3\x*  
\v 14 Hakwe Juda mo sow nopre nopre me nonkway popriy e po mon-sorasor. Seyr hano nonkway mokwe Juda hane nion liy-liy-aw ma non-ariy sian mo eir mon lwak. Hakwe hromo nopwey-om mo yor ney-sawk ney-sawk ma hiymon sorasor mokwe, uron lowpwarowp non nuw-meio wayr kraiay. \x * \xo 1:14 \xt Ap 22:3\x*  
\v 15 Sawk God hiykwe hane kokwe ipey hok hane liwak lopa non, hyo maym kow yor ko kueir nonaw me-iaup. \x * \xo 1:15 \xt Ais 49:1\x*  
\v 16 Sa God hiykwe hyo uron arian non, ha hyo ok-ihey ke uwrkayn irweyk me mesor kow e hyo ney se hane ma mesair kow hrahra ha hokwe, hakwe iwar prueyn ki erey suko se mesopok pa, hane hiy-anok anok e. \x * \xo 1:16 \xt Ga 2:7\x*  
\v 17 Seyr hakwe Jerusalem mon ma-ley pa, aposel hano peyr-mawk ma meio nok me lira e. Korey law. Sawk kipay Arebia mon saw-ey. Seyr sohiy so meyki hokwe hakwe Damaskus mon ma-ley.   
\p
\v 18 Yia krompri so meyki hokwe, hakwe Jerusalem mon ley, Pita se nion non-ohruw-a e. Hakwe hye nion kokwe eypok mokwe iha seys iha sirom sankaw non-wak. \x * \xo 1:18 \xt Ap 9:26\x*  
\v 19 Ha serey ma lwak hokwe, hakwe aposel har me lira pa. Sawk Jems, Hakamay so nay-ih se-aw lira.   
\p
\v 20 Ok, ha hme ma mey kow omokwe, ok-arar. God hiykwe senkin nonkway, hakwe hme me-warei-arei kow pey.   
\p
\v 21 Sehiy so meyki hokwe, hakwe kipay Siria o, kipay Silisia o, serey ley. \x * \xo 1:21 \xt Ap 9:30\x*  
\v 22 Sawk enekwei sohiy non kokwe kristen-wayh, Judia mo sios lowpwarowp mon ma lwak me kokwe, hakwe uwr suwon-araw.  
\v 23 Sios somokwe ok senkin ke-aw lonuayk nonaw lwak: Uwr, paraw hreme ma mon yorpayor piapay hiykwe pau, Jisas se nan kiykiy-ay yor, hiy paraw ma mon piapay liok ke lanio mesor kow.  
\v 24 Sawk sios somokwe God so uru se me-ihey, mey, hiy hano mon ma meio se hokuaw.   
\c 2  
\s1 Aposel homkwe Pol so mey uwrkayn irweyk me meio kow ey ke ipan lon  
\p
\v 1 Hakwe yia mokwe 14 sankaw lwak ha, sohiy so meyki hokwe hakwe Jerusalem mon ma-ley, Barnabas se nion. Seyr hakwe Taitus se nak-huonok. \x * \xo 2:1 \xt Ap 15:2\x*  
\v 2 Hakwe serey sehe ley, payhokuaw, God hiykiaw kokwe hane senkin mesair hrahra kow. Ha Jerusalem mon lwak menkin, hakwe kristen mo peyrmawk liarok uwr me nion-aw non-swa-hokruw, hmo hokruw-a arian mon. Hakwe God so ok-ihey ke uwrkayn irweyk me penkin mesor kow e, hakwe uwr serey ma swa-hokruw me ma-me-sorasor kow. Hakwe senkin sehe lon, hano mey, paraw ma meio o, enekwei enkin ma meio o, makuayk lopa ka lwak.  
\v 3 Hano wayh Taitus, hane nion Jerusalem mon ma non-ey hiykwe mo Grik-uwr, sawk Juda-uwr somokwe hreme Taitus so owh-ohi se me-sasay ei ampru sow pa.  
\v 4 Hromkwe lei ampru ok sokwe lohruw-a, payhokuaw, uwr har, kristen-ok ma me homkwe hromo ompok mon ouon-aw po mon loior ne, sawk homkwe kristen korey. Homkwe hromo yor, Krais Jisas hiy hrome ma preisia kow ha ke lira nonkway sue e le. Seyr uwr sohom mo uron mokwe senkin nan, Juda mo sow penkin me e, hromkwe hmo meyki-aw pyay e, seyr hmo mey-uwr puraw lwak e. \x * \xo 2:4 \xt Ga 1:7; 5:1,13\x*  
\v 5 Sawk hromkwe God so ok-ihey ko okar-ok hme nion ma non-wak ke hokuaw kokwe uwr senkin me ipan lon pa, Taitus so owh-ohi se lei ampru sow ey hokwe.   
\p
\v 6 Sawk uwr serey suko, Jerusalem-sios mo uwr karmay me hieyn ma lira mokwe, mo hom karmay lwak hi, karmay lwak lopa lwak hi, hom penkin uwr lwak e, hakwe aiopey liy nanpanan ley. God so lira mesor anon mey kokwe iwar mo owh kumay ko aiopey hay liy nanpanan ley. Sawk uwr karmay somokwe, hane senkin me pa, God so ok-ihey, ha ma mesor mokwe, ha omok ma-mesor ankin, hakwe irweyk eyn mesor e.  
\v 7 Korey law, sawk sios mo karmay somokwe senkin lira; mey, God so ok-ihey ke uwr-kayn irweyk me mesor kow ey kokwe God hiykwe hane po kow, hiy mey God so ok-ihey ke Juda me mesor kow ey ke Pita se peyn kow, senkin kow. \x * \xo 2:7 \xt Ap 22:21\x*  
\v 8 Payhokuaw, God hiykwe Pita se krai po kow, aposel-mey Juda mo ompok mon meio ey hokwe, seyr God hiykwe hane seyn, krai po kow, aposel-mey uwrkayn irweyk mo ompok mon meio ey hokwe.  
\v 9 Seyr Jems, Pita, Jon-om, sios mo hiy-meio kraipakrai-uwr ok ma me homkwe, hane senkin lira nonkway, God hiykwe hyo maym, mey ipey-ar sokwe meio ey hokwe, hane po kow. Homkwe sawk Barnabas o, ha o, hrere iha seme nekie waykuw waykuw. Sohokwe meir, hom hrere nion uron kamon-aw ma non-wawwaw meio ey se mesair kow. Hrom lowpwarowp mokwe senkin me-sakon kawk, hrorkwe uwrkayn irweyk me hiy-meio ey, seyr homkwe Juda me hiy-meio ey.  
\v 10 Homkwe hrere kokwe ok kamon senkin ke-aw me-kow, hrorkwe Juda mo kristen omeme ohna ma lwak me hiy-mon wayr-wayr e. Hmo ok sokukwe hakwe kar ley, payhokuaw mey sokukwe hakwe mo sokwe meio e nuw-nanpanan kraiay. \x * \xo 2:10 \xt Ap 11:29-30\x*   
\s1 Pol hiy Pita so yor piap kamon ke mesor hror-say kow  
\p
\v 11 Sawk Pita hiy Antiok mon le menkin, hakwe hye kokwe yier-ok inopuaw non-me huon, payhokuaw, hiykwe yor piap ke mon, hiy uwrkayn irweyk me nion non-a ankin, hiykwe Juda me ouon-aw nak-wak.  
\v 12 Hiykwe senkin lon, peyr kristen har Juda ko Jems hiy ma me-ha hom lousne lopa non kokwe, hiykwe uwrkayn irweyk me nion non-a. Sawk enekwei uwr sohom lousne menkin, hiykwe uwrkayn irweyk me nion pase manon-waw-waw e, payhokuaw, hiykwe Juda mo kristen, owh-ohi me ma lei mapru sow ke ma nakruok seme nuw-hok. \x * \xo 2:12 \xt Ap 11:3\x*  
\v 13 Hiy senkin lon menkin, wo, Juda mo kristen har homkwe sa hyo okrei-yor sokwe ma-pyay meio. Hom lowpwarowp senkin meio menkin, Barnabas hiy seyn, hmo okrei-yor sokwe makiy-nuw-pyay meio.   
\p
\v 14 Hakwe hom ok-ihey ko okar-ok ko yerki luw-luw-aw mon ma lanio lopa me lira menkin, hakwe sa Pita se hmo lowpwarowp mo inour mon senkin sehe me, “Hunkwe Juda-uwr, sawk hunkwe uwr-kayn irweyk me hieyn-aw nuw-wayr, hunkwe Juda mo sow me pyay pey. Hai, hwon uwr-kayn irweyk me ma me-sasay kraiay, hom Juda mo yor me pyay e, suw penkin so?”   
\s1 Juda-uwr o, uwr-kayn irweyk o, yerki kamon-aw nonaw huonok prosue ey  
\p
\v 15 Okar, hromkwe Juda mo ney-nona, hromkwe uwrkayn irweyk, yor piap-araw non ok ma me mo ney-nona korey.  
\v 16 Sawk hromkwe senkin nonkway, God hiy uwr prueyn se luw-luw-aw-ok ma me hokwe, Jisas Krais se ma nan kiykiy-ay so kueir nonaw me, Moses so sow me ma meio wayr se hokuaw me pey. Hrom seyn, Krais se sehe nan kiykiy-ay, God hiy hreme luw-luw-aw-ok ka me. Moses so sow me meio yerki so kueir nonaw korey, sawk nan kiykiy-ay yor ko kueir nonaw. Payhokuaw, Moses so sow me ma meio yerki so kueir nonaw hokwe uwrsa me kokwe luw-luw-aw-ok liy me ley. \x * \xo 2:16 \xt Ap 15:10-11; Ro 3:20-28; Ga 3:11\x*   
\p
\v 17 Enekwei hrom Krais so kueir nonaw luw-luw-aw lwak e ma nakyas hokwe, hromkwe hromkiaw-ayay senkin lira nonkway, hromkwe uwrsa yor piap-araw non, uwr-kayn irweyk me hieyn. Hai, ok sohok ko meyk kokwe senkin ko, Krais hiykwe yor piap-araw ko mey me hiy-mon kraipakrai? Hakwe hme senkin ma-sahre me: Korey law-ar!  
\v 18 Sawk hakwe Juda mo sow me pyay yerki, ha ma lokriy hain se ma-meio ie ankin, hrom sow sohom mo ouon mon lwak e, hano ma-meio ie mey sokukwe yor piap ok liy me.  
\v 19 Sawk Moses so sow hokwe hane po mon okrue. Sow sohiy so nene mon kokwe, hakwe lokrue-uwr se hieyn lwayr, ha God se nion su non-wayr peyow peyow e. Hanekwe Krais se nion hyo now mon po nak-okin pror kawk sawan okrue. \x * \xo 2:19 \xt Ga 1:4\x*  
\v 20 Sa ha su ma lwayr ohokwe, ha korey, sawk Krais hiykiaw hano mon lwayr. Ha ki mon su ma lwayr ohokwe, hakwe God so ney se nan-kiykiy-ay yor nonaw lwayr. Hiykwe hane uron-pi ko-ar nuw-wak, seyr hiykwe hiykiaw-ayay hane hokuaw po lokrue kow.  
\v 21 Hakwe God so maym-kow-yor ke mey ayay yaprue ma leip lopa ke hieyn meykyay mon liy sasow ley. Payhokuaw, hane luw-luw-aw-ok me ey hokwe, Moses so sow me ma pyay yerki non lonok hokwe, Krais hiykwe puraw lokrue!   
\c 3  
\s1 Juda mo sow me nakruok yerki hokwe, nan kiykiy-ay yerki se hieyn korey  
\p
\v 1 Galesia lowk la-pa-la ey om, hmo uron mokwe poso hay non mon way-sowp-a-sowp mo? Jisas Krais se now ayaw mon ma nak-okin pror sawan okrue hokwe, hakwe hmo inour mon kumay-ar po me-sorasor popriy kow.  
\v 2 Hakwe hme ok kamon senkin kiy-mesopok, homkwe hane kwa kiy-mekow: Hom God so Niohney se ma lonok hokwe, homkwe yerki Juda mo sow me ma pyay non po lonok pak, God so ok-ihey ke ma lonuayk nan kiykiy-ay yerki non po lonok pak?  
\v 3 Homkwe panoke lowk la-pa-la o? Hom kristen ma lwak mokwe, homkwe God so Niohney non lanio meio pie. Hai, enekwei enkin ohokwe, homkwe iwar mo krai non lanio meio sop-sow e panoke mon o?  
\v 4 Hmey, low senkin senkin hmo owh mon ma lousne somokwe, hme hiymon orok kraiay lopa lwak ey pak? Okar-ar, low somokwe meyk non me lousne.  
\v 5 Hai, God hiy hyo Niohney se hme ma kow se me, seyr hyo mey krai non hmo ompok mon ma meio se me, homkwe Moses so sow me ma meio sohiy non po lonok pak? Homkwe God so ok-ihey ke ma lonuayk nanpanan kiykiy-ay sohiy non po lonok pak?   
\p
\v 6 Homkwe Abraham se kwa nanpanan. God so mamey porih hokwe senkin me, “Hiykwe God se nanpanan kiykiy-ay, sa God hiykwe hye luw-luw-aw-ok sehe me.” \rq Stt 15:6\rq*   
\m
\v 7 Sa homkwe senkin seme nonkway e, Abraham so ney-nona-ar mokwe, uwrsa, God so ok-ihey ke ma nan kiykiy-ay hom non.  
\v 8 God hiy uwrkayn irweyk me hmo nan kiykiy-ay yor me hokuaw luw-luw-aw ok me ey hokwe, hiykwe paraw-ar nanpanan pie. Sa God so mamey porih hokwe God so Ok-ihey ke Abraham se senkin mesor kow, “Hakwe uwrsa lowpwarowp me kokwe hno kueir nonaw hiy-mon ihey ey.” \rq Stt 12:3\rq*   
\m
\v 9 Abraham hiykwe God se nan kiykiy-ay, God hiykwe hye yaprue sehe hiy-mon ihey. Seyr uwrsa lowpwarowp God se posokwaw nan kiykiy-ay e, God hiykwe hme yaprue hiymon ihey ey, Abraham se ma mon ihey senkin.   
\p
\v 10 Uwrsa, Moses so sow hom hme hiymon e ma nakay nakay homkwe, God so hruo-yay-kow-ok ouon mon lwak, payhokuaw, God so mamey porih hokwe senkin me, “Uwrsa, sow lowpwarowp, Moses so mamey mon ma mey me senkinaw pyay meio wayr pa lwak ankin, homkwe God so hruo-yay-kow-ok ouon mon lwak.” \rq Lo 27:26\rq*   
\m
\v 11 Enkin kokwe hromkwe kumay-ar po nuw-nonkway, God so inour mon hwon luw-luw-aw lwak ey hokwe, yerki Moses so sow hok ma me non liy lwak ley. Payhokuaw, God so mamey porih hokwe senkin me, “Uwr luw-luw-aw-ok ma me mokwe, God se nan kiykiy-ay yerki nonaw lwayr ey.” \rq Hab 2:4\rq*   
\m
\v 12 Sawk Moses so sow me ma pyay yor kokwe, nan kiykiy-ay yor ke nakay nakay pey. Korey, God so mamey porih hokwe sawk irweyk senkin lohruw-a, “Uwr, yor lowpwarowp, Moses so sow hok ma me seme posokwaw pyay lowpway e, hiykwe su ya lwayr a.” \rq Wkp 18:5\rq*   
\m
\v 13 Hrom hruo-yay-kow-ok ouon mon ma lwak hokwe, Krais hiykiaw po swahya sow lonok, sa hiykwe hreme po kahya huonokyaw prosue, sow ko hruo-yay-kow-ok ouon ko mokwe. Payhokuaw, God so mamey porih hokwe senkin me, “Now mon kokwe poso uwrsa me nak-okin pror kawk sawan e, homkwe God so hruo-yay-kow-ok ouon mon lwak.” \rq Lo 21:23\rq*   
\m
\v 14 Krais hiy hreme ma kahya huonok prosue so meyk-ar hokwe senkin, God so hiy-mon ihey yor Abraham se ma me-loray hokwe, seyr uwrkayn irweyk me kow ey. Sohokwe Krais Jisas so yerki mon-aw kow ey, seyr nan kiykiy-ay yor ko kueir hokwe hromkwe niohney, God hiy ma me-loray se liy lonok.   
\s1 Moses so sow o, God so me-loray ok o  
\p
\v 15 Hano wayh-om, hakwe mey kamon, uwrsa hom eypok lowpwarowp ma meio ke kiy-me lunlun ley: Suw senkin, uwr prueysyar sokior-ok ke non-me sakon kawk ankin, hohkwe hoho uru se sokior-mamey mon mey iawon, suw uwr prueyn hiykwe ok kamon ke liy ma-mon-say ley, seyr hiykwe ok irweyk manak-mey peykyay lopa.   
\p
\v 16 Suw senkin, God hiykwe hyo me-loray mokwe, Abraham o, hyo ney-nona o, hehe non-me-loray. God so mamey porih hokwe senkin me pa, “Hyo ney-nona me me-loray”. Korey, senkin me hokwe, uwrsa kraiar me po me. Sawk God so mamey porih hokwe senkin me, “Hyo ney-nona se me-loray.” Ok sohok ko meyk kokwe senkin, uwr prueyn-awaw se me. Sohokwe Krais hiy non. \x * \xo 3:16 \xt Stt 12:7; 13:15; 24:7\x*  
\v 17 Hano ok-ku kokwe senkin: Sokior-ok, God hiy Abraham se nion ma non-me sakon kawk hok lousne pie. Sohiy so meyki, 430 yia hom ley lowpway menkin, sa Moses so sow hok lousne. Sa Moses so sow hokwe, sokior-ok ke liy kamaun sow ley, seyr God so me-loray-ok ke liy mon-say ley. \x * \xo 3:17 \xt Kis 12:40\x*  
\v 18 Sawk God so kyai hreme kow ey mokwe, Moses so sow ke-aw nakay nakay hokwe, hyo kyai somokwe hyo me-loray-ok ke liy nakay nakay ley. Sawk God so kyai, Abraham se ma kow kokwe, hyo me-loray-ok ke hokuaw kow. \x * \xo 3:18 \xt Ro 4:14\x*   
\p
\v 19 Hai, Moses so sow ko meykyar hokwe penkin so? God hiykwe sehe nak-kow peykyay, yor piap-araw hok penkin lwak e, hoko meykyar ke kumay-ar nuw-mesair kow e, senkin-awaw, omok Abraham so ney-nona, God hiy ma me-loray, hiy lousne sehe. Sow mokwe ensel hom nak-kumey kow, sa Moses so iha mon kow, hiykwe God o, uwrsa o, hmo ompok uwr. \x * \xo 3:19 \xt Ro 5:20; Ap 7:38\x*  
\v 20 Uwrku kamon-aw lwak hokwe, ompok-uwr lopa, payhokuaw ompok-uwr hiykwe uwrku kreys so ok me lonuayk ohruw-a kow. Sawk God hiykwe prueyn-awaw.\f + \fr 3:20 \ft Nonkway-uwr har homkwe senkin nan: Moses so sow hokwe ompok-uwr non, hiykwe uwrsa o, God o, hoho ompok mon lwak, hmo sow me nakruok yor me lira nonkway e. Sawk God so me-loray-ok, Abraham o, hyo ney-nona o, hme hiymon kraipakrai ey kokwe, ompok-uwr lopa, payhokuaw me-loray-ok sokukwe God prueyn-awaw hiy me-loray.\f*   
\s1 Moses so sow ko meyk-ar hiy non  
\p
\v 21 Hai, Moses so sow hokwe, God so me-loray-ok ke aw lono pak? Korey law-ar. Payhokuaw, sow kamon, su mon wayr peyow ey hreme kow hokwe, uwrsa me luw-luw-aw-ok me ey hokwe sow sohokwaw po mon ousne. \x * \xo 3:21 \xt Ro 8:2-4\x*  
\v 22 Sawk God so mamey porih hokwe senkin me-kumay kow, uwrsa kipay lowpwarowp ko homkwe yor piap-araw ko krai ouon mon lwak. Sawk God so kyai, paraw ma me-loray, Jisas se ma nan kiykiy-ay se hokuaw ma kow ey sohokwe, uwrsa ma nan kiykiy-ay me kow ey.   
\p
\v 23 Sawk enekwei, Hakamay se nan kiykiy-ay yor hok le lopa non kokwe, peyr hreme kokwe Moses so sow hok nak-piar sous, kalabus-uwr me hieyn. Senkin-awaw, enekwei Hakamay se nan kiykiy-ay yor hok kumay-ar nuw-ousne hrahra ha. \x * \xo 3:23 \xt Ga 4:3\x*  
\v 24 Moses so sow sokukwe hromo puar-now sokwe lwak, hrom Krais so owh mon ley e. Sa hrom Krais se ma nan kiykiy-ay se hokuaw kokwe hreme luw-luw-aw-ok ka me. \x * \xo 3:24 \xt Ro 10:4\x*  
\v 25 Sawk enekwei enkin ohokwe, Hakamay se nan kiykiy-ay yor hokwe papo lousne. Sawk Moses so sow hokwe, hromo puar-now liy ma-lwak ley.   
\s1 Hromkwe God so ney  
\p
\v 26 Ama, hom lowpwarowp, Krais Jisas se ma nan kiykiy-ay se hokuaw kokwe, God so ney-ar. \x * \xo 3:26 \xt Jon 1:12\x*  
\v 27 Payhokuaw, hom lowpwarowp Krais se nion non-wak e ma prouk mokwe, Krais se po lie swawar-sow ha, omeme owh ko me ma lie swawar-sow ha me hieyn. \x * \xo 3:27 \xt Ro 6:3\x*  
\v 28 Homkwe senkin nonkway e, Juda-uwr o, uwrkayn irweyk o, homkwe irweyk korey. Seyr mey-uwr puraw o, uwr, liaup-uwr lopa o, homkwe irweyk korey. Seyr uwr o, sa o, hom seyn, irweyk lwak pey. Payhokuaw, uwrsa lowpwarowp Krais se nion ma non-okin nasay homkwe kamon-aw-aw. \x * \xo 3:28 \xt Ro 10:12\x*  
\v 29 Sawk hunkwe Krais so lwak ankin, hunkwe Abraham so ney-nona, seyr omeme ihey-ar, God hiy ma me-loray mokwe liy lonok. \x * \xo 3:29 \xt Ro 4:13\x*   
\c 4  
\p
\v 1 Hano ok peyr-mon ma kiy-mesor ha kokwe, hakwe owhnan-ok kamon ke senkin makiynak-mesor peykyay ley: Aio prueyn so ney norwayo hakamay hiy ney nopre lwak ankin, hiykwe peyr mey-uwr se hieyn puraw lwak, payhokuaw, hiykwe orih so omeme, omok hiy nakruok ey somokwe, peyr liy hiy-wayr ley, mo omeme senkin hyo uru mon lwak hi.  
\v 2 Enekwei hiy ney ma lwak hokwe, hiy o, hyo omeme o, somokwe peyr uwr har, orih hiy ma liaup hom hiy-wayr mno nyanyaw. Sawk omok enekwei-ar, aio hiykiaw ma meir kow non manak-our swahis-yay kow, ney sohiy so iha arian mon.  
\v 3 Seyr yerki liy-liy-aw non kokwe, hrom paraw ney me hieyn ma lwak mokwe, hromkwe peyr ki ohiy so krai senkin senkin mo mey-uwr puraw lwak. \x * \xo 4:3 \xt Kol 2:20\x*  
\v 4 Sawk enekwei-ar hiy lousne menkin, God hiykwe hyo ney arian se me-ha, ki mon. Hiykwe ney norwayo nopre se hieyn le, sa prueyn ki ko hok liwak, seyr hiykwe Moses so sow ko ouon mon nuw-ariy warkiayr. \x * \xo 4:4 \xt Jon 1:14; Ro 1:3\x*  
\v 5 Hiykwe sehe le, uwrsa, Moses so sow ouon ko me nakway huonok prosue e. Hiykwe senkin sehe lon, hrom lowpwarowp God so ney lwak e.   
\p
\v 6 Sa hrom God so ney-ar ma lwak mokwe, God hiykwe sawk hyo ney so niohney se me-ha, hromo uron mon kokwe. Niohney sohokwe hromo uron mon senkin sehe hiymon okre me, “Abba,\f + \fr 4:6 \ft Ok Abba sokukwe, Grik-ok korey. Ok sokukwe Hibru-ok, Jisas so yier ko ok. Ok sohok ko meyk kokwe senkin: Aio.\f* aio.”  
\v 7 Ama, suw senkin, enkin kokwe homkwe mey-uwr puraw ma-lwak pey, sawk homkwe hyo ney-ar lwak. Hom hyo ney-ar ma lwak somokwe, God hiykwe omeme, hyo ney me ma nak-wayr kow naruok somokwe, hme ya kow a. \x * \xo 4:7 \xt Ro 8:15-17\x*   
\s1 Pol hiykwe Galesia mo sios me uron lowk kworpakwor  
\p
\v 8 Paraw kokwe, homkwe God se nonkway pa, enekwei sohokwe homkwe krai senkin senkin, god-ar ma lwak lopa mo mey-uwr puraw lwak wayr.  
\v 9 Sawk enekwei ohokwe homkwe God se papo nonkway, sa hakwe yaprue senkin kiy-me ley, enekwei ohokwe God hiykwe hme papo nonkway. Hai, suw pay weyn ko, hom ki ohiy so niohney krai lopa mo owh mon ma ma-samar nok somokwe? Seyr homkwe niohney nompou ma lwak sohom mo mey-uwr puraw panoke ma-lwak ley?  
\v 10 Ama, homkwe eypok enekwei har o, yeyn har o, ayay-wor har o, yia har o, sohom mo sow nopre nopre me pyay meio wayr. \x * \xo 4:10 \xt Ro 14:5; Kol 2:16\x*  
\v 11 Hmo yor somokwe, hakwe uron lowk kworpakwor kawk, hano mey hmo ompok mon ma hiy-meio mokwe, puraw po nuw-meio hihir-say pak?   
\p
\v 12 Hano wayh-om, hakwe hme lonseyn kraiay, homkwe hane hieyn lwak e, payhokuaw, ha seyn, hmo wayh lwak ey hokwe hme hieyn po lwak. Homkwe hane yor piap-araw mon pa.  
\v 13 Homkwe papo nonkway, ha peik ma lwak se hokuaw God so ok-ihey kokwe, hakwe hme sehe hiy-me sorasor pie.  
\v 14 Peik hano owh mon ma lwak okukwe mo hme low nuw-kow hi, sawk homkwe hane me-puar pa, seyr hane me-krweys kawk pa. Korey law, homkwe sawk hane senkin lon ihey, hane kokwe homkwe God so ensel se hieyn me-huonok. Okar, hom hane ma huonok hokwe, homkwe hanekwe Krais Jisas hiykiaw ma le eyn senkin huonok.  
\v 15 Enekwei sohokwe homkwe kar nuw-ey, hai, hmo kar ley yor somokwe penkin makiy-on mo? Hakiaw kokwe hme senkin nuw-nonkway popriy, hmo uron hane hiy-mon ey hokwe, aiopey hay nuw-nan. Seyr homkwe hmo nene arian me hane po kamair kow, homkwe liy lwak hokwe.  
\v 16 Hme ha ok-ar-ok ke ma mesor kow ohiy, homkwe hane kokwe awia-pow-ok sehe me pak?   
\p
\v 17 Kwa lonuayk, unsaney har, ok-ihey ke irweyk eyn kankoum e ma nuw-nakyas somokwe, mo hom mey kraiar nakyas meio hi, uwr sohom mo uron mokwe hme hiy-mon e nan pey. Homkwe hme mon sous-a-sous prosue e nanpanan, hom hane nion ma non-wak ohiy. Homkwe hme senkin seme mon, homkwe hme lira-way e, seyr hme-aw hiy-mon e.  
\v 18 Hwon mey, meyk yaprue non me uron lowpwarowp non nuw-nakyas meio hokwe, yaprue-ar. Sawk hunkwe enekwei ha hne nion non-wak nonaw peie meio o.  
\v 19 Hano ney ihey-ar ama, hakwe ipey, ney ma liwak ke hieyn. Hakwe senkin lokinhre ir, aw lok yor sokukwe ipey, hok ney ma liwak enekwei sok ma lokinhre ir, sohok ko liy-liy-aw-ar. Hakwe aw hme hokuaw senkin-aw sehe lok wayr-wayr, hom Krais se hieyn liy-liy-aw nuw-wak e.  
\v 20 Hano uron ipey-ar hokwe hme nion non-wak e nan koukou-ay, hano nays-ok lohruw-a yor me mon nonyo sow e hokuaw. Payhokuaw, hakwe hme kokwe uron lowk kworpakwor kawk.   
\s1 Owhnan-ok, Hagar, Sara leys se ma me-memeir hok non  
\p
\v 21 Ama, homkwe Moses so sow ouon mon lwak e mon ankin, hane kwa mekow: Homkwe ok, Moses so sow hok ma me mokwe, nonkway lwak pa mo?  
\v 22 Payhokuaw, God so mamey porih hokwe senkin me, Abraham hiykwe ney norwayo prueysyar non. Prueyn hokwe mey-sa puraw Hagar hok liwak, prueyn hokwe hyo sah arian Sara hok liwak. \x * \xo 4:22 \xt Stt 16:15; 21:2\x*  
\v 23 Abraham so ney, mey-sa puraw Hagar hok ma liwak hokwe, iwar mo kyai non lira me. Sawk hyo ney prueyn, hyo sah arian Sara hok ma liwak hokwe, iwar mo kyai non lira me pa. Sawk ney sohokwe God so me-loray-ok arian non lousne. \x * \xo 4:23 \xt Ro 9:7-9\x*   
\p
\v 24 Ok, ney prueysyar sehe ma me hokwe, owhnan-ok. Sa prueysyar sokukwe God so sokior-ok kreysyar hiy ma me-sakon kawk me memeir. Sokior-ok kamon kokwe mnuw Sainai mon ma kow hok non. Sokior-ok sokukwe Hagar ke hieyn, payhokuaw, ney hok ma liwak hokwe, uwrsa mey puraw ma meio sese yay wayr hom non.  
\v 25 Hagar hokwe mnuw Sainai, kipay Arebia mon ma lwak so owh-nan, seyr om Jerusalem, enekwei enkin ma lwak so owh-nan. Payhokuaw, Jerusalem o, uwrsa serey ma lwak o, homkwe mey puraw ma meio sese yay wayr yor ko ouon mon lwak.  
\v 26 Sawk Jerusalem nonkumey ko hokwe, sa-ar-sa. Seyr hokwe hromo ipey. \x * \xo 4:26 \xt Hi 12:22; MHO 21:2,10\x*  
\v 27 God so mamey porih hokwe senkin me,  
\q1 “Sa-ney-weyn homkwe, kar kwa ley. Sa, ney sumow ma swaun lopa homkwe yu kwa laun sian okre me. Payhokuaw, sa, ney ma liwak lopa hokwe ney kraiar non lwak ey. Hoko ney mo meir mokwe sa uwr non mo eir mon lwak ey.” \rq Ais 54:1\rq*   
\p
\v 28 Hano wayh-om, suw senkin, homkwe Aisak se hieyn, God so me-loray-ok non ma lousne hiy non. \x * \xo 4:28 \xt Ro 9:7\x*  
\v 29 Enekwei sohokwe, ney prueyn, uwrsa mo kyai non ma lousne hiykwe, ney, God so Niohney so krai non ma lousne se, yor piap-araw non mon yorpayor piapay. Sa enekwei enkin ohokwe liy-liy-aw lwak.  
\v 30 Sawk God so mamey porih hokwe penkin me ko? Hokwe senkin me, “Mey-sa puraw o, hoko ney o, hehe kwa me-su ha. Payhokuaw, mey-sa puraw ko ney hiykwe, aio so omeme-kopi mokwe, ney norwayo, sa-ar hok ma liwak se nion liy non-waw-waw opri nak-wayr ley.” \rq Stt 21:9-10\rq*   
\m
\v 31 Hano wayh-om, suw senkin, hromkwe mey-sa puraw ko ney korey. Sawk hromkwe sa-ar-sa ko ney-ar.   
\c 5  
\s1 Krais so mon kokwe hremekwe papo hrorsay preisia ha  
\p
\v 1 Krais hiy hreme ma hror-say preisia ha so meyk-ar hokwe senkin, hromkwe liaup-uwr, hreme me-sasay meio ey lopa lwak e. Homkwe sehe hokuaw kwa lorok kraipakrai, seyr homkwe homkiaw-ayay ipan peie lon kow o, sow sohom mo mey-uwr puraw ma-lousne e.   
\p
\v 2 Hano ok mokwe, kwa lonuayk popriy. Hakwe Pol, hakwe hme senkin mekow, homkwe homkiaw-ayay hmo owhi me isay ei mapru sow ankin, suw homkwe senkin mesair kow, homkwe mey, Krais hiy hme ma meio kow kokwe, po kyor-osi ha.  
\v 3 Uwr hyo owh-ohi arian se posokwaw isay ei ampru sow e, hakwe uwr senkin se ma-me-kupaku, hiykwe Moses so sow lowpwarowp me pyay meio lopa liy lwak ley.  
\v 4 Hmo uwr har, Moses so sow ko yerki nonaw luw-luw-aw lwak e ma mon homkwe, Krais so ohriar ma-lwak pey. Seyr homkwe papo makuayk sakuayk, God so maym kow yor ko meykyay mon lwak.  
\v 5 Sa hromo uron mokwe God so Niohney so krai nonaw hyohyo senkin lon, God hiykwe hromo nan kiykiy-ay yor ko kueir nonaw hreme luw-luw-aw-ok ya me a, sa hromkwe enekwei sehe naruok wayr.  
\v 6 Sawk hrom Krais Jisas so mon ma lwak hokwe, yor owh-ohi me ma lei mapru sow o, seyr yor owh-ohi me ma lei mapru sow lopa o, somokwe meyk lopa, hreme liy hiymon ley. Sawk yor, meyk ipey-ar non hreme hiymon ey hokwe, nan kiykiy-ay yor, uron-pi ko-ar lwak yor nonaw ma meio mesair kow hiykwaw. \x * \xo 5:6 \xt 1 Ko 7:19; Ga 6:15\x*   
\p
\v 7 Paraw kokwe homkwe Krais so yerki yaprue mon lanio sayok liok. Sawk hmekwe posokwaw makiy-mon sous mo, hom God so okar-ok ke ma pyay lopa omokwe.  
\v 8 Ama, hme senkin ma mon weih-a-weih somokwe, God hme ma me-huonok hiy mon weih-a-weih pey.  
\v 9 Homkwe owhnan-ok okwe senkin kwa nanpanan: Yis paswaw-ney hokwe ihey mo naw hrawey hrawey ke liy mon oun-sian ie. \x * \xo 5:9 \xt 1 Ko 5:6\x*  
\v 10 Sawk Hakamay so kueir hokwe, hano uron hokwe hme kokwe senkin nan kraiay popriy, homkwe ok, ha ma hiymon sorasor irweyk eyn liy ma-kankoum ley. Sawk hmo nanpanan yor mokwe posokwaw mon way-sowp-a-sowp e, uwr sohokwe, mo hiy pay uwr lwak e, God so aw-mar hokwe hye ya mon piapay a. \x * \xo 5:10 \xt 2 Ko 11:15; Ga 1:7\x*   
\p
\v 11 Hano kristen wayh-om, sawk hakwe senkin mesor hokwe, owh-ohi me lei mapru sow yor hokwe God so yerki, luw-luw-aw lwak ey hok non, hai, hane kokwe yor piap-araw non payhokuaw ma-mon yorpayor wayr o? Hakwe owh-ohi me lei mapru sow yor me hiy-mesor wayr hokwe, hano ok, Krais hiy now mon ma lokrue sawan hokwe, uwrsa homkwe ok-piap-ok liy ma-me ley.  
\v 12 Uwr owh-ohi me ma lei mapru sow ok me ma mesor somokwe hme low kow. Hano uron hokwe senkin lwak, uwr senkin somokwe lei mapru sow yor ke kar ley ankin, homkwe homkiaw-ayay kwahnaw nuw-ei piapay lowpway e.   
\p
\v 13 Hano kristen-wayh-om, Krais hiykwe hme seme me-huonok, hom uwrsa God hiy ma hror-say preisia ha me hieyn lwak e. Sawk hom uwrsa ma hror-say preisia ha ma lwak somokwe, homkwe senkin peie nan o, homkwe yor piap-araw senkin senkin me liy mon. Ohow, senkin korey, sawk homkwe wayh-wayh me uron-pi ko-ar lwak yor non kwa hiymon. \x * \xo 5:13 \xt 1 Pi 2:16\x*  
\v 14 Sow lowpwarowp mokwe, ok kamon-awaw ko kopuw ouon mon lwak: “Hunkwe hno wayh-wayh me uron-pi ko-ar kwa nuw-wak, hunkiaw-ayay uron-pi ko-ar ma lwak, senkin.” \x * \xo 5:14 \xt Ro 13:9\x*  
\v 15 Sawk homkwe homkiaw-ayay ay-kaman me hieyn lonkuw-powr hnar-pa-hnar ankin, homkwe kwa nak-hok, homkwe homkiaw-ayay senaw nuw-mon piapay ha.   
\s1 Niohney Pekney-weys hiykwe hne ka hiy-anok anok anio  
\p
\v 16 Ok, ha ma me kokwe senkin, Niohney Pekneyweys hiy hno lwayr yor ke ka hiy-anok anok wayr. Senkin lon ankin, hunkwe hno owh so uron, yor piap senkin senkin me ma nan koukou-ay se liy lonuayk me meio ley.  
\v 17 Payhokuaw, iwar mo owh so uron hiy pay me nan e, hiykwe Niohney Pekney-weys se aw lono. Seyr Niohney Pekney-weys hiy pay me nan e, hiykwe iwar mo owh so uron se aw lono. Hohkwe awia-pow-ar nuw-wak. Hoh senkin ma lon sohokwe, hwon mey penkin ke meio e nan e, hunkwe liy meio ley. \x * \xo 5:17 \xt Ro 7:15-23\x*  
\v 18 Hno peyrmawk hokwe Niohney hiy hiy-anok anok nok ankin, hunkwe sow so ouon mon lwak pey.   
\p
\v 19 Iwar mo owh so uron so kyai piap-araw hom pay me mon e, somokwe kumay lwak: Yokun nweyh kane yor senkin senkin o, yor orki non o, seyr kyai piap-araw uron ko se ma lok-sian o. \x * \xo 5:19 \xt 1 Ko 6:9-10\x*  
\v 20 Seyr okrei-god me me-ihey yor o, nokous-mey o, lira muar yor o, aw lono yor o, lira way yor o, aw-mar lie yor o, peyr-mawk akre akre lwak yor o, lon-seyrpaseyr yor o, uwrku irweyk irweyk-aw lokima nakrok yor o.  
\v 21 Seyr kasaw lon peys yor o, wain-hu lowswa lawk-lawk yor o, yor piap-araw hokruw enekwei sok ma non-wawwaw mon sohom o, seyr yor har liy-liy-aw senkin ma lwak sohom o. Paraw, ha hme ma me-kupaku hokwe, hakwe hme liy-liy-aw senkin ma-me kupaku, uwrsa yor seme ma mon somokwe, God so Wayr-hre-yier hokwe, homkwe lyawriy wayr lopa.   
\p
\v 22 Sawk ayay yaprue, Niohney hiy ma mon eip sawan hokwe, senkin, uron-pi ko-ar yor, kar ley yor, liwak marowhway yor, lorok kraiay naruok yor, wayh-wayh me nan-ihey yor, yor yaprue, nan kiykiy-ay lorok kraiay yor,  
\v 23 liwak meinkiowp yor, hunkiaw-ayay-aw lanok anok yor. Sow kamon hokwe yor yaprue seme liy me-sous ley.  
\v 24 Uwrsa Krais Jisas so homkwe, iwar mo owhi so uron o, hyo lira way yor senkin senkin o, seyr hyo yor piap, omeme senkin senkin me ma nan koukou-ay o, somokwe now ayaw mon po nak-okin pror kawk okrue. \x * \xo 5:24 \xt Ro 6:6; Kol 3:5\x*  
\v 25 Niohney hiy hreme su lwayr ey se ma kow hokwe, hromkwe Niohney hiykiaw ma hiy-anok-anok wayr so meyki-aw pyay anio e.  
\v 26 Hromo uru arian me peie nak-me-heyr o, seyr hromkwe hromkiaw-ayay aw lono e peie me-sian sasian o. Seyr hromo uron mokwe hromkiaw-ayay peie lira way kriypakriy o. \x * \xo 5:26 \xt Fl 2:3\x*   
\c 6  
\s1 Uwrsa lowpwarowp me kokwe yor yaprue me-aw kwa mon  
\p
\v 1 Kristen wayh-om, homkwe hmo uwr prueyn hiy yor piap-araw kamon ke mon se lira ankin, hmo har niohney so ouon mon-aw ma lanio homkwe uwr senkin sehe sosok-aw kwa hiymon owk wowr-a-wowr popriy. Seyr homkwe homkiaw-ayay iray-iray non kwa nak-wak, hmekwe seyr Satan hiy senaw nak-mon eykawn makuayk. \x * \xo 6:1 \xt Mat 18:15\x*  
\v 2 Homkwe hmo kristen-wayh mo low me homkiaw-ayay eysawk eysawk kwa hiy-way. Hom senkin lon ankin, homkwe Krais so sow hrawey hrawey ke lonuayk me meio. \x * \xo 6:2 \xt Ro 15:1\x*  
\v 3 Sawk uwr prueyn hiykiaw-ayay kristen ipey-ar ok ma me hiykwe, sawk senkin lwak pa lwak ankin, hiykwe hiykiaw-ayay okrei-ok lohruw-a.  
\v 4 Hmo prueyn prueyn-aw homkwe hmo mey arian me kwa lira lahan lahan ir. Hno mey yaprue lwak ankin, hunkwe hno mey arian ke liy nak-me-heyr. Sawk hunkwe hno mey arian ke, uwrsa har mo mey me nion peie lira lahan meir o.  
\v 5 Payhokuaw, hmo prueyn prueyn-aw homkwe hmo low arian me kwa linon. \x * \xo 6:5 \xt Ro 14:12\x*   
\p
\v 6 Uwrsa, God so ok me ma mon sorasor homkwe, hom omeme yaprue pay me nakruok e, uwr hme ma hiymon sorasor sehe kwa ma-sahre kow. \x * \xo 6:6 \xt 1 Ko 9:11,14\x*   
\p
\v 7 Hunkwe hunkiaw-ayay okrei-ok peie lohruw-a o. Uwr prueyn hiykwe God se kokwe liy mon lawk-lawk ley. Payhokuaw, uwr prueyn hiykwe pay me saro e, mo hiy ma saro se-aw ma-lompan kawk.  
\v 8 Payhokuaw, uwr prueyn hiykwe iwar so owh so uron piap-araw so wueir mon saro ankin, hiykwe lokrue se lompan kawk ey. Sawk uwr prueyn hiykwe niohney so wueir mon saro ankin, hiykwe Niohney Pekney-weys so lwayr peyow ayay me lompan kawk ey. \x * \xo 6:8 \xt Ro 8:13\x*  
\v 9 Hromkwe mey yaprue me ma meio omokwe, owh nompou peie lwak o. Payhokuaw, hromkwe meio kane pa lwak ankin, hromkwe ayay hrom ma saro somokwe enekwei-ar hiy lousne sok lompan kawk ey.  
\v 10 Suw senkin lwak, mey, uwrsa me hiymon popriy ey hromo owh mon ma lousne omokwe, hromkwe meio nonaw lwak e. Sawk hromkwe hromo kristen-wayh, God se ma nan kiykiy-ay me hiymon pie e.   
\s1 Pol hiykwe Krais so lokrue-now se nak-me-heyr  
\p
\v 11 Ok-kopi okukwe hakwe hano iha arian non kiy-mey-a-mey. Homkwe hano mey yor arian ke kwa lira, hano ok-mawk mokwe aiopey hay.   
\p
\v 12 Kwa lonuayk, uwr har hmo owh-ohi me ma me-sasay ei mapru sow somokwe, hmo uru arian me nak-ie e nan. Uwr somokwe yor yaprue uron ko me nanpanan pey, sawk homkwe yor inopuaw ma lwak me-aw nak-me-heyr. Uwr somokwe owh-ohi me ma lei mapru sow yor sokwe nakruok wayr, uwrsa hom hme Krais so lokrue-now se hokuaw mon yorpayor ame.  
\v 13 Mo uwr sohom hmo owh-ohi me lei mapru sow hi, homkwe Moses so sow so meyki pyay pey. Uwr somokwe hme seme me-sasay ei mapru sow, hom uwr sohom mo ouon mon lwak e. Uwr somokwe homkiaw-ayay nak-me-heyr ey, hom hmo lei mapru sow ok ko meyki pyay ankin.  
\v 14 Hakwe sawk nak-me-heyr-ok kamon lopa, sawk Hakamay Jisas Krais so now se-aw nak-me-heyr ey. Payhokuaw, Krais hiy now mon ma lokrue hokwe, weynpaweyn ki ko homkwe hano inour mon po lokrue. Ha seyn, weynpaweyn ki ko mo inour mon liy-liy-aw po ma-sahre okrue.  
\v 15 Mo owh-ohi me lei mapru sow hi, mo owh-ohi me lei mapru sow lopa hi, somokwe meyk lopa, hme liy hiymon ley. Sawk meyk ipey-ar hme hiymon ey hokwe, God hiy hme iwon ma mon ousne hiy non. \x * \xo 6:15 \xt 2 Ko 5:17\x*  
\v 16 Liwak marowhway yor o, uron lowk yor o, somokwe uwrsa ok sokwe ma pyay o, God so uwrsa, Israel o, hme nion ka non-wak.   
\p
\v 17 Hano ok pariawey-ar kokwe senkin, uwr prueyn hiykwe hane low peie manak-kow peykyay o. Payhokuaw, ha Jisas so mey-uwr puraw ma lwak ohokwe, hano owh mon kokwe kuor-peyk senkin senkin hom lwak. \x * \xo 6:17 \xt 2 Ko 4:10\x*   
\p
\v 18 Hano wayh-om, hromo Hakamay Jisas Krais so maym kow yor hokwe hmo prueyn prueyn-aw mo niohney me nion ka non-wak. Okar-ar.