\id COL  - Abau NT [aau] -Papua New Guinea 2006 (DBL -2014) 
\h KOLOSI 
\toc1 Pol so mamey, sios Kolosi mon ma lwak se ma mey kow ha hok non 
\toc2 Kolosi 
\toc3 Kol 
\mt1 KOLOSI  
\mt2 Pol so mamey, sios Kolosi mon ma lwak se ma mey kow ha hok non  
\ip \bd Meyamey uwr hokwe:\bd* Aposel Pol.  
\ip \bd Yier hiy ma lwayr meyamey hokwe:\bd* Hiykwe yier Rom mon lwak non meyamey.  
\ip \bd Enekwei hiy ma meyamey hokwe:\bd* Hiykwe enekwei Yia 60 sok po meyamey kok pak e, Yia 61 sok po meyamey kok pak e, Jisas hiy ma lokrue so meyki.  
\ip \bd Ok mamey mon ma lwak mokwe senkin:\bd* Aposel Pol hiykwe mamey okukwe hiy kalabus-uwr Rom mon-aw lwak non meyamey kow ha, yier Kolosi hiy ma ley ira lopa se. Hiykwe nan kiykiy-ay uwrsa yier serey suko mokwe, hiy Efesus mon lwak non nonkway, hiy hyo lanio mesor nok mey kamon kamon ke lanio meio nok non. Seyr hiykwe uron aiopey hay sehe nuw-nan kworpakwor kawk, payhokuaw, okpey piap-araw har sios Kolosi ko mon ma lousne sohom. Weynpaweyn Kolosi me ma mon piapay mokwe, okrei-okpey senkin senkin o, Juda mo yor me me-sasay pyay weynpaweyn o, sohom nuw-mon piapay, wo, Jisas se kokwe sawk ensel prueyn se hieyn-aw sehe lira me. Aposel Pol hiykwe weynpaweyn seme mon popriy e meyamey, senkin mesair kow e, Krais hiykwe mo God hiykiaw, seyr lwayr peyow God se hieyn-aw ma nuw-wak prusow hiy non.  
\ip \bd Mamey ohok ko meyk-ar hokwe senkin:\bd* Aposel Pol hiykwe hyo mamey ipey-ar okukwe, Krais hiy God ma lwak se mesair kow popriy ihey. Krais hiykwe God hiykiaw panapan ma lwak se mesair popriy kow ihey.  
\c 1  
\s1 Pol so peyrmawk-ok  
\p
\v 1 Hakwe Pol, hakwe Krais Jisas so aposel. Ha aposel ma kiy-wak ohokwe, God so uron arian nonaw me-iaup. Mamey okukwe, ha Pol hiy mey, seyr Timoti hromo wayh hiy seyn, siraw non-mey.   
\p
\v 2 Hrorkwe Kolosi mo kristen-uwrsa, Krais so kueir nonaw ma nan kiykiy-ay kraiay me mey kow ha.  
\p God, hromo Aio ma lwak, hiykwe hme kokwe maym kow yor o, liwak marowhway yor o, seme ka kow.   
\s1 Mesopok me-ihey-ok hok non  
\p
\v 3 Enekwei enekwei hrom hme God se ma hiy-mesopok ohokwe, hromkwe hromo Hakamay Jisas Krais so Aio God se me-ihey.  
\v 4 Payhokuaw, hromkwe hmo yor yaprue me po lonuayk, hom Jisas Krais se ma nan kiykiy-ay o, seyr kristen-uwrsa lowpwarowp me uron-pi ko-ar ma lwak o. \x * \xo 1:4 \xt Ef 1:15-16\x*  
\v 5 Hmo nan kiykiy-ay yor o, hmo uron-pi ko-ar yor o, hom uron hyohyo ma lon mon lorok kraiay. Hom uron hyohyo pay me lon e, somokwe nonkumey mon-aw kawk popriy nak-okin sakawk kow koruay. Hom ok-ar-ok, God so ok-ihey ke lonuayk pie menkin, homkwe God so me-loray-ok, hrom hyohyo ma lon me lonuayk. \x * \xo 1:5 \xt Ef 1:13; 1 Pi 1:4\x*  
\v 6 God so ok-ihey sokukwe kipay lowpwarowp mon kokwe ayay yaprue po leip, seyr aiopey hay po lousne, hmo ompok mon yaprue ma leip wayr senkin, enekwei hom God so maym kow yor ko ok me lonuayk pie non, seyr yaprue nuw-nonkway popriy non.  
\v 7 Homkwe God so maym kow yor ko ok sokukwe hromo wayh ihey-ar prueyn Epafras so mon po lonuayk. Hiykwe hreme hokuaw kokwe Krais so hiymon kraiay wayr uwr ipey-ar. \x * \xo 1:7 \xt Kol 4:12; Fm 1:23\x*  
\v 8 Sa hiykwe hrere senkin mekow, uron-pi ko-ar lwak yor, God so Niohney hiy ma kow hokwe, hmo ompok mon lwak.   
\s1 Krais hiykwe penkin uwr so  
\p
\v 9 Hromkwe hom God so meyki ma pyay seme ma lonuayk pie hokwe, hromkwe God se pase mesopok kane kane e. Hromkwe God se sehe mesopok wayr, hiykwe hme hyo uron ko arian me ka mesair kow, seyr homkwe mawkhow ihey-ar o, nonkway yaprue o, Niohney hiy hme ma kow sohom non ka nak-wak. \x * \xo 1:9 \xt Ef 1:16-17\x*  
\v 10 Suw homkwe liwak-yor, God hiykiaw ma nan-ihey mon liy lanio. Seyr mey yaprue, God hiy kar ma ley mokwe homkwe kraiar mon ousne ey, seyr hom God se ma nonkway hokwe aiopey hay nuw-eyr ie ey.  
\v 11 Hyo krai panpaniowni non hokwe, hme ka mon kraipakrai, sa homkwe low senkin senkin mokwe yor yaprue nonaw, senkin-aw liy lorok kraiay ira huon. Sa homkwe kar nonaw, \x * \xo 1:11 \xt Ef 1:19; 3:16\x*  
\v 12 Aio God se liy me-ihey, payhokuaw, hiykwe hme ipan po lon, sa homkwe kristen-uwrsa, Ey-yar so Wayr-hre-yier mon ma lwak me nion, ompay-ompay, God hiy kow e ma liaup mokwe liy non-wawwaw onok. \x * \xo 1:12 \xt Ef 1:11,18\x*  
\v 13 Hiykwe hreme kokwe eym-nawp so krai so iha ko se po kahya prosue, seyr hyo Ney, hiy uron-pi ko-ar ma nuw-wak so Wayr-hre-yier mon po lokriy-yay kow. \x * \xo 1:13 \xt Luk 22:53; Ef 2:2\x*  
\v 14 Hyo Ney so mey ke hokuaw kokwe hreme kokwe po nakway prosue, suw senkin, hromo weynpaweyn piap-araw mokwe papo lorionay ha. \x * \xo 1:14 \xt Ef 1:7\x*   
\s1 Krais hiykwe lowpwarowp mo eir mon lwak  
\p
\v 15 God se kokwe liy lira ley, sa Krais hiykwe God hiykiaw panapan, senkin lousne. Hiykwe ompay-ompay lowpwarowp, paraw-ar ma monhre sohom mo ney norwayo peyr-mawk ko hiy non. \x * \xo 1:15 \xt Jon 1:18; 2 Ko 4:4\x*  
\v 16 Omeme lowpwarowp nonkumey ko o, ki ko o, omeme, hrom ma lira o, omeme hrom ma lira lopa o, Krais so kueir nonaw monhre. Mo krai senkin senkin ayaw ko hi, mo hakamay hi, mo hiy-wayr-uwr hi, mo makwey-uwr seirpey hi, lowpwarowp somokwe Krais so kueir nonaw monhre, seyr omeme lowpwarowp somokwe hye-aw monhre kow.  
\v 17 Omeme ki erey suko me ma monhre pie lopa ma lwak hokwe, Krais hiykwe po lwak. Sa Krais se hokuaw kokwe, omeme ki erey suko homkwe hmo yop arian mon-aw lorok. \x * \xo 1:17 \xt Jon 1:1; 8:58\x*  
\v 18 Hiykwe hyo owhi, sios ko makwey. Hiykwe meykyar, seyr lokrue ko se peyr-mawk ma loksian hiy non. Suw senkin sehe lousne, hiy omeme lowpwarowp mo eir mon lwak e. \x * \xo 1:18 \xt Ap 26:23; Ef 1:22-23; MHO 1:5\x*  
\v 19 Sawk God hiy Krais se kar ma nuw-ey hokwe, hyo kyai lowpwarowp mokwe Krais so mon nuw-wanohyay loum-a-loum. \x * \xo 1:19 \xt Kol 2:9\x*  
\v 20 Krais so kueir nonaw kokwe, God hiykwe omeme lowpwarowp hiy ma monhre, mo ki mon lwak hi, mo nonkumey mon lwak hi, somokwe hyo owh arian mon ma-me-huonokyaw nok lowpway, hye nion uron kamon-awaw manon-wak e. God hiykwe liwak marowhway yor kokwe Jisas so nioh, hiy now mon ma sawan eysow sohiy non-aw mon kampi ousne. \x * \xo 1:20 \xt Ef 1:10; 2:16\x*   
\p
\v 21 Paraw kokwe, homkwe God so meiaw-ar nuw-wak, seyr homkwe God so awia-pow lwak, payhokuaw weynpaweyn hom ma meio o, uron hom ma nanpanan o, somokwe piap-araw. \x * \xo 1:21 \xt Ro 5:10; Ef 2:12\x*  
\v 22 Sawk enekwei enkin ohokwe, God hiykwe hyo ney, uwr ki ko se hieyn ma lokrue so kueir nonaw kokwe, hme hyo wayh ihey-ar po mon wak. Hiykwe senkin sehe lon, hiy hme hyo inour mon pekneyweys, orki lopa, seyr heyn lopa mesay iarok e. \x * \xo 1:22 \xt Ef 2:14-16; 5:27\x*  
\v 23 Sawk homkwe hmo nan kiykiy-ay yor ke kwa nakruok wayr. Yor sokukwe meyk ka loksow, seyr ka lorok kraipakrai wayr. Homkwe hyohyo lon yor, hom ok-ihey ke ma lonuayk non ma lonok kokwe, peie lokriy ha o. Ok-ihey sokwe hokuaw kokwe, Pol hakwe, mey-uwr sehe lwak. Ok-ihey sokukwe uwrsa lowpwarowp kipay lowpwarowp ko me po mesor kow.   
\s1 Pol hiy sios so mey-uwr ma lwak hiy non  
\p
\v 24 Sa hakwe hme hiymon ey me hokuaw aw ma nak-ok hokwe, hakwe kar ley. Payhokuaw, low, ha ki erey mon ma lonok hokwe, Krais so owhi, sios se ma me se hiy-mon. Sa hakwe yerki sohiy nonaw Krais so aw nak-ok yor me meio lowpway ey.  
\v 25 Sa God hiykwe hanekwe sios ko mey-uwr po mon wak. Hme hiymon ey hokwe, hiykwe hanekwe mey kamon ke meio e me-iaup. Mey sokukwe senkin, hyo ok-ihey hrawey hrawey ke nuw-mesor hrahra ha e. \x * \xo 1:25 \xt Ef 3:2,7-8\x*  
\v 26 Ok-ihey sokukwe enekwei meipey hokwe ouon-aw nuw-wak wayr, senkin-awaw, enekwei ohiy kiy-ousne. Sawk enekwei enkin ohokwe ok-ihey sokukwe hiykwe kristen-uwrsa me po kiy-mesair hrahra kow. \x * \xo 1:26 \xt Ro 16:25-26; Ef 3:5,9\x*  
\v 27 God so uron hokwe senkin, hiykwe hyo ok-ihey ouon-aw ma nak-wak se hyo uwrsa me mesair kow hrahra ha e mon wayr. Ok-ihey sokukwe seirpey-ar, seyr panpaniowni non, uwrkayn irweyk lowpwarowp me hiymon ey hok non. God so ok-ihey ouon-aw ma lwak sokukwe senkin, Krais hiykwe hmo mon lwayr. Suw senkin, homkwe God so panpaniowni hokwe ya non-swapeykyay onok a.   
\p
\v 28 Sohiy so hokuaw kokwe, hromkwe Krais se kokwe uwrsa lowpwarowp me seme mesor kow. Mawkhow ihey-ar lowpwarowp hromo mon ma lwak non kokwe, hromkwe uwrsa me hiymon sorasor me-kupaku. Hrom uwrsa lowpwarowp seme Krais se hokuaw mnow-mnow-aw hiy-iarok e, God so inour mon.  
\v 29 Mey aiopey hay sokwe meio ey hokwe, hakwe krai ipey-ar, Krais so mon ma le, seyr hano owh mon ma meio sohiy non nuw-meio kraipakrai sese yay. \x * \xo 1:29 \xt Ef 3:7,20; Fl 4:13\x*   
\c 2  
\p
\v 1 Hano uron hokwe senkin, homkwe senkin nonkway e, hakwe hme hokuaw aw po hiy-orok ono, seyr uwrsa Laodisia ko o, uwrsa lowpwarowp hane ma lonyay lopa ma lwak o, seme hiymon ey hokwe.  
\v 2 Hakwe senkin sehe meio, uwrsa sohom mo uron me hiymon kraipakrai e, seyr hom uron-pi ko-ar lwak yor non kamon-aw lwak e. Sa uwrsa hom senkin ma lwak me hokuaw kokwe, hmo yor God se ma nuw-nonkway hokwe, aiopey hay-ar liy nuw-ousne. Sa homkwe yerki sohiy nonaw kokwe, God so ouon-aw-ok, Krais se nian ma me ke liy nuw-nonkway popriy.  
\v 3 God so mawkhow ihey-ar o, nonkway o, somokwe omeme ihey-ar Krais so mon ma kawk sue me hieyn. \x * \xo 2:3 \xt 1 Ko 1:24,30\x*  
\v 4 Sa hakwe mamey okukwe hme senkin sehe kiy-mey kow ha, homkwe uwr prueyn se ipan peie lon kow o, hme okrei-ok senkin senkin non lon-seyrpaseyr lokin lor-a-lor e, mo okrei-ok sohom yaprue lwoun hi. \x * \xo 2:4 \xt Ro 16:18\x*  
\v 5 Payhokuaw, mo ha owhi non hmo meiaw lwak hi, niohney non kokwe hakwe hme nion non-wak. Sa ha hom suhway-aw ma nuw-nakrok kraiay, seyr hmo Krais se nanpanan kiykiy-ay yor hok wei-a-wei lopa ma lwak se ma lira hokwe, hakwe kar nuw-ey. \x * \xo 2:5 \xt 1 Ko 5:3\x*   
\s1 Hom Krais se nion ma non-wak hokwe, iwar mo sow senkin senkin mo ouon mon peie lwak o  
\p
\v 6 Hom Krais Jisas se hmo Hakamay ok ma me hokwe, homkwe uwrsa, hye nion ma non-okin nasay me hieyn kwa lanio wayr.  
\v 7 Homkwe hme ma hiymon sorasor senkin kwa lon: Krais so mon kokwe homkwe meyk ouon-ar kwa nuw-oksow, seyr hmo liwak yor mokwe Krais so eir mon kwa meio inakrok, seyr hmo nanpanan kiykiy-ay yor mokwe krai ipey-ar ka lwak nonay nonay ie. Seyr hmo nak-me-ihey yor mokwe ka nuw-wak prusow. \x * \xo 2:7 \xt Ef 3:17\x*   
\p
\v 8 Homkwe iray-iray non kwa nak-wak, sa uwr prueyn hiy hme iwar mo mawkhow ihey-ar senkin senkin non-aw me-loior kow lak, hom hyo mey-uwr puraw lwak e. Iwar mo mawkhow ihey-ar somokwe Krais so mon le pey, sawk nopwey-om mo okpey, seyr krai senkin senkin ki ehe ma hiy-wayr mo owh ko me ma le hom non.   
\p
\v 9 Payhokuaw, Krais hiy uwr se hieyn ki erey ma lwayr hokwe, hyo kyai mokwe God hiykiaw panapan. \x * \xo 2:9 \xt Jon 1:14,16\x*  
\v 10 Sa Krais so kueir nonaw kokwe, God hiykwe hme su lwayr yor ihey-ar kokwe po nuw-kow prusow. Krais hiykwe niohney, ki ehe ma hiy-wayr o, makwey-uwr senkin senkin o, hmo eir mon lwak. \x * \xo 2:10 \xt Ef 1:21-22\x*   
\p
\v 11 Sa Krais so kueir hokwe, hmo owh-ohi mokwe po lei mapru say. Sawk hmo owh-ohi somokwe, uwr ki ko hom ma lei eyn lei pa, sawk hmo owh-ohi somokwe Krais hiykiaw lei. Meyk kokwe senkin, hmekwe “uwr nawp” hromo mon ma lwak so krai ouon ko mokwe, po hrorsay preisia hrahra ha. \x * \xo 2:11 \xt Ro 2:29\x*  
\v 12 Payhokuaw, hwon hu mon prouk menkin, hne kokwe Krais se nion non-opru kawk. Seyr hno nan kiykiy-ay yor ko kueir nonaw kokwe, hnekwe Krais se nion po ma-me oksian, krai, God hiy Krais se lokrue ko se ma me-oksian sohiy non. \x * \xo 2:12 \xt Ro 6:4\x*   
\p
\v 13 Enekwei hom owh-ohi ma lei mapru sow lopa ma lwak hokwe, hme kokwe hmo yor piap-araw homkiaw mon okrue. Sawk hmekwe God hiykiaw Krais se nion su po ma-mon oksian wayr. Seyr hiykwe hromo yor piap-araw mokwe po lorionay kow. \x * \xo 2:13 \xt Ef 2:1,4-5\x*  
\v 14 Seyr hiykwe mamey piap-araw, hreme heyn-non-ok ma me ke po ka-mon-say ha lowpway. Mamey sokukwe, hrom God so sow o, yor senkin senkin o, seme ma kamaun-sow me ma mey hok non. Hiykwe mamey sohok ko krai se nuw-mon piapay, enekwei hiy mamey sokwe now mon nak-okin pror kawk iarok menkin. \x * \xo 2:14 \xt Ef 2:14-16; 1 Pi 2:24\x*  
\v 15 Sa now, hye nian ma nak-okin pror kawk sawan sohiy nonaw kokwe, Krais hiykwe nonkumey ko hiy-wayr-uwr o, makwey-uwr o, seme lono swakakar. Sa hiykwe makwey-uwr seme kalabus-uwr me hieyn iha me lway pruwmapruw nok, hyo meyki arian mon inopuaw me-sasay okyah nok.   
\p
\v 16 Hakwe hme sehe me, uwrsa har homkwe hmo la yor o, hmo lowswa yor o, enekwei pekneyweys hom ma nanpanan iwak nieys o, yeyn iwon me ma hokruw yor o, Sabat-enekwei o, somokwe piap eyn lira mesor anon-anon ankin, hme kokwe peie lonuayk o. \x * \xo 2:16 \xt Ro 14:1-12\x*  
\v 17 Yor senkin somokwe, owhnan me hieyn, weynpaweyn omok lousne ey me memeir, sawk meykyar-ar hokwe Krais hiykiaw. \x * \xo 2:17 \xt Hi 8:5\x*  
\v 18 Sa uwrsa, homkiaw-ayay-aw ma nak-me-heyr sohom mo yor, hme God so maym ko me ma ka-osi ha ke ipan peie lon kow o. Uwrsa somokwe, now homkiaw ma liawon ira me me-sor e nakrion say, hmo uru arian me nakie e. Mo uwrsa sohom homkiaw-ayay uwrsa yaprue ok me hi, uwrsa somokwe uru lopa me hieyn lanio pey. Sa homkwe sow har, ensel me kampueys me-ihey ey me hiymon sorasor. Uwrsa senkin sohom mo nak-me-heyr ok mokwe meyk lopa, sawk homkwe hmo uru arian me puraw lowk nakie.  
\v 19 Sa uwrsa somokwe Krais, hiy sios so makwey ma lwak se ma-nakruok kraipakrai pey. Sios hokwe Krais so owhi, sa Krais so kueir nonaw kokwe, owhi sokukwe aiopey hay leyr, seyr owhi sohok ko kopi kopi mokwe hreyrmawk o, owp o, hom nekie peykyay. Sa owhi sokukwe God hiy ma nan senkin sokwe lariy ie. \x * \xo 2:19 \xt Ef 2:21; 4:16\x*   
\s1 Krais se nion ma non-okrue o, Krais se nion su ma non-wayr o  
\p
\v 20 Homkwe Krais se nion po non-okrue, seyr hmekwe niohney ki ehe ma hiy-wayr mo krai ouon ko mokwe po hrorsay preisia ha. Hai, senkin lwak ankin, homkwe sawk uwrsa, ki erey suko mo sow ouon mon ma lwak me hieyn panoke lwayr o? \x * \xo 2:20 \xt Ga 4:3,9; 1 Ti 4:3\x*  
\v 21 Hai, homkwe sow senkin, “Omeme senkin me peie lonok o”, “Ay sehie peie mnor ir o”, “Somokwe peie sapou o”, somokwe homkwe panoke lonuayk me pyay o?  
\v 22 Yor senkin somokwe omeme, hrom pokon-aw ma nakyas meio me lohruw-a; somokwe enekwei meipey liy lwak ley. Payhokuaw, yor somokwe uwrsa ki ko homkiaw meio ousne, seyr homkiaw hiymon sorasor. \x * \xo 2:22 \xt Mat 15:9\x*  
\v 23 Sawk sow senkin ma lwak mokwe yaprue korey: Kampueys me-ihey yor senkin senkin me ma me-sasay pyay o, uwrsa, mey-uwr puraw ok ma me-loior o, yor, hmo owhi arian me ma mon low-a-low o, sow somokwe mo uwrsa har hom mawkhow ihey-ar non ok me hi, hme liy hiymon ley. Seyr iwar mo lira way yor piap-araw ke liy mon sosor ley.   
\c 3  
\s1 Lwayr yor porih o, iwon o  
\p
\v 1 Hme Krais se nion su ma ma-me-sian wayr hokwe, hmo uron mokwe omeme nonkumey mon ma lwak me-aw nan e. Serey mon kokwe Krais hiykwe hyo sia-king mon God so iha sayar mon liwak. \x * \xo 3:1 \xt Mak 12:36; 16:19; Ef 1:20\x*  
\v 2 Hmo nanpanan yor mokwe omeme ayaw ko me-aw nanpanan kraiay popriy e, omeme ki erey suko me peie nanpanan o. \x * \xo 3:2 \xt Mat 6:33\x*  
\v 3 Payhokuaw, homkwe po lokrue, sa hmo wa mokwe Krais so kueir nonaw God so mon lwak sue.  
\v 4 Krais hiykwe hmo wa-ar, sa enekwei hiy lousne ankin, hom seyn, hye nion non-ousne nok, hyo panpaniowni se non-swapeykyay onok ok.   
\p
\v 5 Homkwe kyai piap-araw ki erey suko me kwa lokin kwor okrue. Kyai senkin: yokun nweyh kane yor senkin senkin o, yor orki non o, yokun-uron o, lira way yor piap-araw o, ompreir kawk yor o. (Suw senkin, ompreir kawk yor hokwe okrei-god me ma me-ihey yor hok non.) \x * \xo 3:5 \xt Ro 6:6,11; Ef 4:19\x*  
\v 6 God so aw-mar hokwe, kyai piap-araw seme hokuaw, ya lousne a, uwrsa hye hyaw ma lwak mo owh mon kokwe. \x * \xo 3:6 \xt Ef 5:3-6\x*  
\v 7 Hmo liwak yor paraw-uh mokwe mo senkin lwak, seyr homkwe kyai piap-araw sohom mo krai ouon mon lwak.  
\v 8 Sawk enekwei enkin ohokwe, homkwe kyai piap-araw enkin: kasaw lon hohuaw yor o, aw-lwon ma saw-ie o, har me ma mon yorpayor o, me-kawrpakawr ok o, ok-piap-ok hmo woki ko o, somokwe homkwe kwa lokriy ha. \x * \xo 3:8 \xt Ef 4:25-29; 5:4\x*  
\v 9 Homkwe hmo wayh-wayh me okrei-ok peie lokin lor-a-lor kow o, payhokuaw, homkwe “uwr nawp” kyai piap-araw non se po kanseyn yay hain, \x * \xo 3:9 \xt Ef 4:22,25\x*  
\v 10 sawk homkwe uwr iwon se po lie. Uwr iwon sohiy so Monhre-uwr hokwe, mo God hiykiaw-aw, sa hiykwe uwr iwon sohokwe hiykiaw panapan iwon-ar sehe mon wak, hom hye nonkway nuw-wak e. \x * \xo 3:10 \xt Ef 4:24\x*  
\v 11 Sa God so inour mon kokwe hrom lowpwarowp mokwe liy-liy-aw, mo hom uwrkayn irweyk hi, hom Juda hi, mo hom owh-ohi lei mapru hi, hom lei mapru lopa hi, mo hom uwrsa nonkway lopa hi, uwrsa, uwrku Skit ko hi, mo hom uwrsa puraw hi, hom uwrsa liaup-uwr lopa lwak hi, hom lowpwarowp mokwe irweyk irweyk korey. Sawk Krais hiykiaw-aw, hmo lowpwarowp mo peyrmawk ma liarok hokwe, seyr hiykwe hmo lowpwarowp mon lwak. \x * \xo 3:11 \xt Ga 3:28\x*   
\p
\v 12 Homkwe God so uwrsa, hiy ma me-iaup hom non; homkwe pekney-weys, sa hiykwe hme uron-pi ko-ar lwak. Sohiy so hokuaw kokwe, homkwe yor omokwe omeme owh ko me hieyn kwa lie: uron lowk yor o, wayh-wayh me nan ihey yor o, yor, uru lopa se hieyn ma lanio o, kopowrie yor o, lorok kraiar naruok yor o. \x * \xo 3:12 \xt 1 Pi 2:9\x*   
\p
\v 13 Homkwe homkiaw-ayay hohuaw-yor lopa kwa non-wawwaw meio. Seyr homkwe homkiaw-ayay yier-ok lohruw-a ankin, hunkwe hno wayh so yor me kwa lorionay kow ha, Hakamay hiy hno yor piap me ma lorionay kow senkin. \x * \xo 3:13 \xt Ef 4:2,32\x*  
\v 14 Yor sohom mo eir mon kokwe, homkwe uron-pi ko-ar lwak yor ke kwa nak-meio peykyay. Yor sokukwe hme lowpwarowp me uron kamon-awaw siraw-aw nekie kraipakrai ey. \x * \xo 3:14 \xt Ro 13:8-10\x*   
\p
\v 15 Hmo uron mon kokwe Krais so liwak marowhway yor hok ka hiy-wayr. Payhokuaw, God hiykwe hme owhi kamon-awaw lwak e sehe me-huonok, hom liwak marowhway yor ko ouon mon lwak e. Sa homkwe God se kar nonaw nak-me-ihey e. \x * \xo 3:15 \xt 1 Ko 12:27; Fl 4:7; Ef 4:4\x*  
\v 16 Homkwe Krais so ok kokwe hmo uron mon kokwe ompuay kwa isay yawriy wouk-wouk-ay. Homkwe homkiaw-ayay mawkhow ihey-ar non-aw kwa hiymon sorasor me-kupaku. Homkwe yayh mamey porih ko o, yayh sios ko o, yayh niohney ko o, seme kar nonaw God se kwa lowk. \x * \xo 3:16 \xt Ef 5:19\x*  
\v 17 Hom mey penkin me meio e, ok penkin me lohruw-a e, homkwe Hakamay Jisas so uru nonaw kwa meio, hom hyo kueir nonaw Aio God se nak-me-ihey mokwe. \x * \xo 3:17 \xt 1 Ko 10:31; Ef 5:20\x*   
\s1 Hromo liwak yor iwon ko yor yaprue hom non  
\p
\v 18 Sa om, homkwe hmo uwr mo ouon mon kwa lwak, payhokuaw Krais se hokuaw kokwe yor senkin sokukwe yaprue. \x * \xo 3:18 \xt Ef 5:22\x*   
\p
\v 19 Uwr om, homkwe hmo sa me uron-pi ko-ar kwa lwak. Homkwe hmekwe nays-ok peie me o. \x * \xo 3:19 \xt Ef 5:25\x*   
\p
\v 20 Ney om, homkwe enekwei enekwei hmo ipey-aio mo ok me kwa lonuayk me. Payhokuaw, yor sokukwe Hakamay se kar mon ey ey. \x * \xo 3:20 \xt Ef 6:1\x*   
\p
\v 21 Ipey-aio om, homkwe hmo ney me ok meyk lopa non me peie me-hohuaw o, sawk hom ney mo uron me mon piapay lak. \x * \xo 3:21 \xt Ef 6:4\x*   
\p
\v 22 Mey-uwrsa puraw om, homkwe hmo liaup-uwr ki erey suko mo ok lowpwarowp me kwa lonuayk me. Homkwe hmo liaup-uwr, hiy hme ma lira soway-soway sohiy nonaw peie meio o, hiy hme senkin nan e, homkwe mey-uwr yaprue-ar. Sawk hmo mey mokwe homkwe ok-ar yor nonaw, seyr Hakamay se hok-uron nonaw kwa meio. \x * \xo 3:22 \xt Ef 6:5-8\x*  
\v 23 Hom pay mey me meio e, hunkwe hno uron lowpwarowp non kwa nak-meio. Hno meio yor kokwe, mey, uwrsa me ma meio kow senkin peie meio o, sawk God se ma meio kow, senkin kwa meio.  
\v 24 Homkwe nonkway, homkwe pie, Hakamay hiy hyo uwrsa me kow e ma liaup mokwe, ya lonok a. Payhokuaw, Liaup-uwr-ar hom ma meio kow hokwe, Hakamay Krais hiykiaw.  
\v 25 Seyr uwrsa yor piap-araw me ma mon nakyas mo yor piap mokwe ya ma-sahre nakway a. Payhokuaw, God hiykwe uwrsa lowpwarowp me kokwe meir liy-liy-aw nonaw mesor anon anon. \x * \xo 3:25 \xt Ro 2:11\x*   
\c 4  
\p
\v 1 Liaup-uwr om, homkwe hmo mey-uwrsa puraw mokwe yaprue nonaw, seyr luw-luw-aw kwa hiy-wayr. Payhokuaw, hom seyn, Liaup-uwr non, hiykwe nonkumey mon lwak. \x * \xo 4:1 \xt Ef 6:9\x*   
\s1 Lanok-anok ok  
\p
\v 2 Homkwe God se kokwe senkinaw-aw mesopok e, seyr enekwei hom mesopok ankin, homkwe iray-iray non kwa nak-wak, seyr God se kwa nak-me-ihey. \x * \xo 4:2 \xt Ef 6:18; Fl 4:6\x*  
\v 3 Enekwei hom God se mesopok ankin, homkwe hreme God se kwa hiy-mesopok. Sa hiykwe hreme yerki yaprue, hrom ouon-aw-ok Krais se ma lohruw-a ke mesor ey se ka kampi kow. Payhokuaw, ha kalabus mon ma lwak ohokwe mo sehe lwak. \x * \xo 4:3 \xt Ro 15:30; Ef 6:19\x*  
\v 4 Homkwe God se senkin mesopok e, ha ok mesor ankin, hakwe kumay-ar ka nuw-mesor hrahra ha, God hiykiaw ma nan senkin.  
\v 5 Homkwe hmo weynpaweyn, uwrsa Krais se ma nan kiykiy-ay lopa me ma mesair kow mokwe, mawkhow ihey-ar non kwa nak-mesair kow. Enekwei hmo nan kiykiy-ay yor me me-sor kow ey hom lousne ankin, homkwe enekwei senkin somokwe mey yaprue kwa meio. \x * \xo 4:5 \xt Ef 5:15-16\x*  
\v 6 Enekwei enekwei hno ok, uwrsa me nion ma non-ohruw-a mokwe yaprue ka lwoun, seyr wonor ka lwak. Seyr hunkwe uwrsa lowpwarowp mo mesopok me ma-sahre onuayk me yerki hokwe nonkway kwa nuw-wak popriy. \x * \xo 4:6 \xt Ef 4:29; 1 Pi 3:15\x*   
\s1 Me-ihey ok pariawey  
\p
\v 7 Tikikus, hromo wayh ihey-ar, seyr hiymon kraiay wayr uwr ipey-ar, seyr Hakamay so mey ke ma non-wawwaw meio hiykwe, ha penkin lwak e, hme ya me-nonkway kow a. \x * \xo 4:7 \xt Ef 6:21\x*  
\v 8 Hakwe hyekwe hmo owh mon sehe me-ha, sa hiy, hrom lowpwarowp erey ma lwak hom penkin lwak e, seme hme mesor kow ankin, hiykwe hme kar liy mon ey. \x * \xo 4:8 \xt Ef 6:22\x*  
\v 9 Hye nion kokwe Onesimus hiy non-e. Hiykwe hromo wayh ihey-ar, seyr mey meio kraipakrai uwr, seyr hmo sios arian ko. Hohkwe weynpaweyn erey ma lousne omokwe, hme liy mesor kow. \x * \xo 4:9 \xt Fm 1:10-12\x*   
\p
\v 10 Aristarkus, uwr hane nion kalabus mon ma non-wak hiykwe hme me-ihey ok me-ha, Mak, Barnabas so uwr eynay o. (Homkwe Mak hiy hmo owh mon le ankin, hye me-huonok huon ey so lanok-anok-ok mokwe po lonok.) \x * \xo 4:10 \xt Ap 12:12; 13:13; 15:37-39\x*  
\v 11 Seyr Jisas, Justus-ok ma mowie hiykwe seyr hme me-ihey ha. Juda-uwr ma nan kiykiy-ay, hane nion God so Wayr-hre-yier so mey me ma meio kow mokwe mo homkwaw pruompri-ar. Homkwe hane kraiar po hiy-mon.   
\p
\v 12 Epafras hiykwe seyr hme me-ihey ha. Hiykwe hmo sios arian ko, seyr Krais Jisas so mey-uwr. Hiykwe enekwei enekwei hyo uron lowpwarowp non kokwe hme God se hiy-mesopok, God hiy hme mon orok kraipakrai e, seyr hom God so uron ko so meyki-aw nuw-ey e, kristen-ar mnow-mnow-aw ma lwak, seyr God se uron lowpwarowp non ma nan kiykiy-ay me hieyn. \x * \xo 4:12 \xt Kol 1:7; Fm 1:23\x*  
\v 13 Hakiaw kokwe hme senkin mekow, hiykwe hme o, Laodisia me o, Hierapolis me o, hme lowpwarowp hiymon ey mokwe, mey kraiar po meio.  
\v 14 Hromo wayh ihey-ar Luk, dokta o, Demas o, hohkwe hme me-ihey ha. \x * \xo 4:14 \xt 2 Ti 4:10-11; Fm 1:23-24\x*  
\v 15 Hromo me-ihey ok mokwe, hromo wayh-om Laodisia ko o, Nimfa o, sios hoko a mon ma hokruw o, seme kwa mekow ha.   
\p
\v 16 Mamey okukwe hom lira mesor lowpway ankin, homkwe sios Laodisia ko mon kwa ma-lira mesor. Seyr liy-liy-aw, homkwe mamey, ha wayh-om Laodisia ko me ma mey kow ha ke kwa ma-lira mesor.   
\p
\v 17 Seyr Arkipus se kwa mekow, “Mey, Hakamay hiy hne ma kow kokwe, hunkwe kwa meio lowpway.” \x * \xo 4:17 \xt Fm 1:2\x*   
\p
\v 18 Me-ihey ok okukwe hano iha arian non kiy-mey: “Pol hakwe hme me-ihey ha.” Homkwe ha kalabus-a mon ma lwak ohokwe peie lorionay o. God so maym hokwe hme nion ka non-wak. \x * \xo 4:18 \xt 1 Ko 16:21\x*