\id 2TI  - Abau NT [aau] -Papua New Guinea 2006 (DBL -2014) 
\h 2 TIMOTI 
\toc1 Pol so mamey meyki ma mey hok non, Timoti se 
\toc2 2 Timoti 
\toc3 2 Ti 
\mt1 2 TIMOTI  
\mt2 Pol so mamey meyki ma mey hok non, Timoti se  
\ip \bd Meyamey uwr hokwe:\bd* Aposel Pol.  
\ip \bd Yier hiy ma lwayr meyamey hokwe:\bd* Hiykwe yier perey lwak non po meyamey pak e, nonkway lopa.  
\ip \bd Enekwei hiy ma meyamey hokwe:\bd* Hiykwe enekwei Yia 66 sok meyamey, Jisas hiy ma lokrue so meyki.  
\ip \bd Ok mamey mon ma lwak mokwe senkin:\bd* Mamey okukwe mamey pariawey, Pol hiy ma meyamey hain hok non po lwak pak, seyr hiykwe hyo mey-wayh Timoti se ma-meyamey kow. Mamey okukwe Pol hiykwe hyo uron ko me lohruw-a, seyr senkin nak-me-kumay, mo hyo enekwei paraw hiy warkiayr-aw ma lwak hi, pariawey lwak hi, God hiykwe lwayr peyow ey non, hye po me-loray kow naruok. Pol hiykwe sawk weynpaweyn omok lousne ey, enekwei uwr hom okar-ok ke kankoum-sow hain ey o, God se Hakamay-ok me ey lopa o, seme lohruw-a. Hiykwe Timoti hiy lorok kraipakrai huon e hiy-ohruw-a, mon piap-ma-piap enekwei hiy lousne ankin.  
\ip \bd Mamey ohok ko meyk-ar kokwe senkin:\bd* Yor senkin senkin mokwe God hiykiaw hiy-anok anok swakakar. Mo yor senkin senkin hom kraiar lousne sa-ousne liok e, God hiykwe liy hiy-anok anok nok, seyr unsaney hye ma nan kiykiy-ay homkwe puraw liy hok ley. Pol hiykwe seyr hyo nan kiykiy-ay yor arian o, hiy ok-ar-ok ke ma lono o, seyr omok God hiy hye pie kow ey o, seme nak-mesor.  
\c 1  
\s1 Pol so peyrmawk-ok  
\p
\v 1 Mamey okukwe ha Pol hiy mey. Ha aposel ma kiy-wak ohokwe, God so uron arian nonaw me-iaup, su lwayr ey, Krais Jisas so mon ma lwak se ma me-loray sehe mesor e.   
\p
\v 2 Mamey okukwe Timoti, hano ney-ar se hieyn ma lwak se mey. Aio God o, hromo Hakamay Krais Jisas o, hohkwe hne maym o, uron lowk yor o, liwak marowhway yor o, seme ka kow. \x * \xo 1:2 \xt Ap 16:11; 1 Ti 1:2\x*   
\s1 Pol so me-ihey ok o, me-kraipakrai ok o  
\p
\v 3 Hakwe hano nopwey-om me hieyn, nanpanan yor uron ko yaprue nonaw God so ouon mon-aw lwak. Seyr ha arawh-eypok lowpwarowp hme ma hiy-mesopok nanpanan hokwe, hakwe God se me-ihey wayr. \x * \xo 1:3 \xt Ap 23:1\x*  
\v 4 Hakwe hno eheyr-hu me nanpanan wayr. Hakwe hne lira e sehe mon, hano kar-ley-yor ke nak-mon prusow ie e.  
\v 5 Hakwe seyr hwon, ok-ar yor nonaw Jisas se ma nan kiykiy-ay se nanpanan. Nan kiykiy-ay yor sokukwe hno poruay Lois ko uron mon o, hno ipey Yunis ko uron mon o, serey lwayr pie, seyr hakwe senkin nonkway, nan kiykiy-ay yor sokukwe hno uron mon lwayr. \x * \xo 1:5 \xt Ap 16:1\x*  
\v 6 Sohiy so hokuaw kokwe hakwe hno uron se senkin sehe mahiy-me nanpanan, hunkwe God so kyai, ha hne ma hiy-nekie mesopok so kueir nonaw ma lonok hokwe kwa nak-meio hniypahniy. \x * \xo 1:6 \xt 1 Ti 4:14\x*  
\v 7 Payhokuaw, Niohney, God hiy hreme ma kow hokwe, hok-niohney se kow pa, sawk Niohney hiy ma kow hokwe krai non, seyr uron-pi ko-ar yor non, seyr yor hunkiaw-ayay lanok anok ey non. \x * \xo 1:7 \xt Ro 8:15\x*   
\p
\v 8 Hunkwe hromo Hakamay se mesor sanion sow ey hokwe, owh-mar peie lon o. Seyr ha Krais se hokuaw kalabus mon ma lwak ehe, owh-mar peie lon o. Sawk God so ok-ihey ke hokuaw, hunkwe hane nion low kwa lway, God so krai non.  
\v 9 Hiykwe hreme po me-huonok prosue, hyo uwrsa pekneyweys lwak e. Hiykwe hrom mey yaprue ma meio se hokuaw huonokyaw prosue pa, sawk hyo uron arian non o, hyo maym arian non o, sohom mo hokuaw huonokyaw prosue. Maym sokukwe hreme Krais Jisas so kueir nonaw, paraw ki ehe monhre lopa non ma kow hiy non. \x * \xo 1:9 \xt Ef 2:8-9; Ta 3:5\x*  
\v 10 Sawk maym sokukwe papo mesair hrahra ha, hromo Huonok-prosue-uwr Krais Jisas hiy ma lousne so kueir non. Hiykwe lokrue se ma mon piapay hiy non. Seyr ok-ihey ko kueir hokwe, su lwayr ey o, lokrue yor lopa o, homkwe po lousne hrahra ha. \x * \xo 1:10 \xt Hi 2:14\x*  
\v 11 Seyr God so ok-ihey ke hokuaw kokwe God hiykwe hane sehe me-iaup, me-sanion sow pie mey o, aposel-mey o, seyr hiymon-sorasor mey o, seme meio e. \x * \xo 1:11 \xt 1 Ti 2:7\x*  
\v 12 Sohiy so hokuaw kokwe, hakwe aw sehe nak-ok, sawk hakwe owh-mar liy lon ley, payhokuaw, hakwe Uwr, ha ma nan kiykiy-ay se nonkway nuw-wak. Seyr hakwe senkin nonkway popriy, hiykwe hyo mey, hano iha mon ma kow mokwe iray-iray nonaw lwak ey, senkinaw-aw, Krais so enekwei hiy lousne.   
\p
\v 13 Ok, hwon hano mon ma lonuayk mokwe, hiymon sorasor ok-ar-ok mo owhnan ke hieyn kwa nakruok kraipakrai. Ok-ar-ok seme nion kokwe homkwe Krais Jisas so kueir nonaw ma nan kiykiy-ay o, uron-pi ko-ar ma lwak o, seme kwa nak-nakruok kraipakrai.  
\v 14 Omeme ihey-ar, hne ma kow mokwe, iray-iray nonaw kwa hiy-wayr. Hunkwe Niohney Pekneyweys, hromo mon ma lwak so krai non kokwe omeme seme iray-iray nonaw kwa lwak. \x * \xo 1:14 \xt 1 Ti 6:20\x*   
\p
\v 15 Hunkwe nonkway, uwrsa lowpwarowp kipay Esia ko mokwe hane po lokriy hain, seyr Figelus, Hermogenes leys seyn, hane po lokriy hain.   
\p
\v 16 God hiykwe Onesiforus se o, uwrsa, hyo a mon ma non-wayr o, uron lowk yor ke ka me-sair kow. Payhokuaw, uwr sohokwe hano uron hokwe enekwei kraiar po hiy-mon kraiay, seyr hiykwe ha kalabus mon ma lwak hokwe, owh-mar lon pa.  
\v 17 Sawk hiy Rom mon lousne menkin, hiykwe hane lanio pawk, senkinaw-aw, hane lirway.  
\v 18 Eypok Pariawey-ar hiy lousne ankin, Hakamay hiykwe hye uron ka lowk. Hunkwe hyo yor yaprue senkin senkin, hane Efesus mon ma hiymon mokwe, papo nuw-nonkway popriy.   
\c 2  
\s1 Krais Jisas so aw-uwr yaprue hiy non  
\p
\v 1 Hano ney ara, hunkwe maym, Krais Jisas so mon ma lwak non kwa lorok kraiay.  
\v 2 Hano ok, ha uwrsa kraiar mo inour mon ma mesor, hwon ma lonuayk mokwe, hunkwe uwrsa, yaprue ma lorok kraiay me kwa hiy-mon sorasor. Sa uwrsa somokwe uwrsa har me liy ma-sahre hiy-mon sorasor.  
\v 3 Hunkwe low hreme nion kwa lway, Krais Jisas so aw-uwr yaprue-ar se hieyn. \x * \xo 2:3 \xt 2 Ti 1:8\x*  
\v 4 Hunkwe aw-uwr mo mey ke po nonkway: aw-uwr hiykwe mey har me seyn nak-meio peykyay pey. Hiykwe aw-uwr mo mey ke-aw meio, hyo peyr-mawk-uwr se kar mon ey e.  
\v 5 Seyr uwr, uwr har me nion ma non-sau ir hiykwe sow mo meyki nuw-pyay sau pa lwak ankin, hiykwe peyrmawk-ar ma sau yakay so pie hokwe liy lonok ley. \x * \xo 2:5 \xt 2 Ti 4:8\x*  
\v 6 Wueir-ayay me meio saro uwr, hiy mey ma meio sese yay se hokuaw kokwe ayay mon-kopi wueir ko mokwe peyrmawk liy lonok a pie. \x * \xo 2:6 \xt 1 Ko 9:7\x*  
\v 7 Ok, ha ma kiy-me somokwe, kwa nanpanan wayr, payhokuaw Hakamay hiykwe, hwon nonkway popriy ey hokwe, hno mawkhow se liy kampi kow.   
\p
\v 8 Hunkwe Jisas Krais, Devit so ney-nona, lokrue ko se ma ma-loksian se kwa nanpanan. Ok sokukwe hano ok-ihey, ha ma mesor hok non. \x * \xo 2:8 \xt Ro 1:3; 1 Ko 15:4\x*  
\v 9 Ha ok-ihey ke ma mesor se hokuaw kokwe, hanekwe kalabus-a mon sen non po piynay sakawk, uwr, yor piap-araw me ma mon se hieyn. Sawk God so ok-ihey kokwe kalabus-a mon sen non piynay sakawk pey. \x * \xo 2:9 \xt Ef 3:1,13; Fl 1:12-14\x*  
\v 10 Sa uwrsa, God hiy ma liaup me hokuaw kokwe, hakwe low lowpwarowp mokwe sehe lorok kraiay, hom Huonok-prosue-mey Krais Jisas so mon ma lwak, lwayr peyow panpaniowni non ke non-swapeykyay onok e.   
\p
\v 11 Ok-ar yaprue kamon kokwe, okwe.  
\q1 Hrom hye nion ma non-okrue hokwe, hromkwe hye nion su ya non-wayr a. \x * \xo 2:11 \xt 2 Ko 4:11\x*   
\q1
\v 12 Hrom lorok kraiay wayr ankin, hromkwe hye nion king me hieyn ya hiy-wayr a. Hrom hye nonkway lopa ok me ankin, hiykwe seyr hreme kokwe nonkway lopa ok ya me a. \x * \xo 2:12 \xt Mat 10:33\x*   
\q1
\v 13 Hromo lorok kraiay wayr yor hom makuayk ankin, hyo lorok kraiay wayr yor kokwe liy makuayk ley, payhokuaw, hiy nanpanan orok kraiay wayr uwr ma lwak hokwe, hiykwe irweyk eyn liy ma-kahre ley. \x * \xo 2:13 \xt Ro 3:3-4; Ta 1:2\x*   
\s1 Mey-uwr, God hiy yaprue ma nan hiy non  
\p
\v 14 Hunkwe uwrsa me ok okwe kwa hiy-mesor nanpanan, seyr God so inour mon senkin kwa nuw-me-kupaku, homkwe ok me peie lon-seyrpaseyr ohruw-a o. Yor senkin sokukwe ay yaprue me liy leip ley, sawk uwrsa, ok seme ma lonuayk me mon piapay. \x * \xo 2:14 \xt 1 Ti 6:4; Ta 3:9\x*  
\v 15 Hunkwe God, hiy hne yaprue nan e kwa nuw-nakyas. Hunkwe mey-uwr, hyo mey ke owh-mar ma lon lopa, seyr uwr, God so okar-ok ke yaprue nonaw ma hiymon sorasor se hieyn kwa lwak. \x * \xo 2:15 \xt 1 Ti 4:6\x*  
\v 16 Hunkwe oksi oksi, God so uron ko mo meyki ma pyay pa ma lwak sohom mo meiaw mon kwa lwak. Ok senkin somokwe uwrsa me God so meiaw-ar nuw-mon wak. \x * \xo 2:16 \xt 1 Ti 4:7\x*  
\v 17 Oksi oksi senkin me ma hiy-mon sorasor somokwe, kuor aiopey-hay, pion me ma loum sopok say ke hieyn. Uwr prueysyar oksi oksi senkin me ma hiy-me-sorasor mokwe Himeneus, Filetus leys. \x * \xo 2:17 \xt 1 Ti 1:20\x*  
\v 18 Hohkwe okar-ok ko yerki hokwe po lokriy hain, seyr senkin me, yor, hrom lokrue ko se ma ma-loksian hokwe, papo lousne. Sa hohkwe uwrsa har mo nan kiykiy-ay me seme mon piapay.  
\v 19 Sawk peir kraipakrai, God hiykiaw ouon mon ma lyay hawon ha kokwe liy sway wei-a-wei ley, seyr hoko eir mon kokwe ok ipey-ar senkin papo nak-mey: “Hakamay hiykwe uwrsa hyo nian ma lwak mokwe nonkway” \x * \xo 2:19 \xt Nam 16:5\x*  
\m seyr, “Uwr senkin posokwaw me e, hiykwe Hakamay so, hiykwe yor piap-araw me kwa lokriy ha.” \x * \xo 2:19 \xt Ais 52:11; Jon 10:14; 1 Ko 8:3\x*   
\p
\v 20 A aiopey hay kamon hokwe omeme senkin senkin gol, silva non ma meio homkwaw lwak pey, sawk omeme now non ma meio o, ki non ma meio o, hom nak-wak. Har mokwe mey ipey-ar me nak-meio ey hom non, har mokwe mey nopre nopre me nak-meio ey hom non.  
\v 21 Sawk uwr, hyo yor piap-araw me posokwaw mon mnow-mnow e, hiykwe omeme, mey ipey-ar me nak-meio ey lwak ey. Payhokuaw, uwr senkin se kokwe pekneyweys mon wak ey, seyr hyo Hakamay se o, hyo mey yaprue senkin senkin me o, seme hiymon ey me naruok koruay.   
\p
\v 22 Hunkwe uwr warkiayr mo lira way yor piap-araw me kwa lokriy ha. Sawk yor luw-luw-aw o, nan kiykiy-ay yor o, uron-pi ko-ar lwak yor o, liwak marowhway yor o, seme-aw kwa meio hniypahniy, uwrsa uron weyspey non, Hakamay hiy hme hiymon e ma mesopok seme nion. \x * \xo 2:22 \xt 1 Ti 6:11\x*  
\v 23 Seyr hunkwe uwr uron yaprue lopa mo oksi-oksi o, lawk-lawk yor non ma lon-seyr-pa-seyr o, seme peie lonuayk o. Payhokuaw, hunkwe nonkway, yor sokukwe okmays okmays lon-me yor ke mon ousne. \x * \xo 2:23 \xt 1 Ti 4:7\x*  
\v 24 Seyr Hakamay so mey-uwr hiykwe, okmays okmays peie lon me o. Hiykwe uwrsa lowpwarowp me uron yaprue kwa nan, seyr hiykwe meinkiowp-ney-aw hiymon sorasor uwr kwa lwak.  
\v 25 Hwon God so mey-uwr ma lwak hokwe, hunkwe uwrsa, hne ma lon-seyp-a-seyp mokwe, sosok-aw seme hiymon sorasor e, seyr uron hyohyo senkin nak-on e, God hiykwe uwrsa sohom mo uron me ya pankaw hiy-mon kama-koum pakane, hom ok-ar-ok ke nuw-nonkway e.  
\v 26 Uwrsa somokwe Satan so naw-pway ouon mon lwak, seyr hyo uron so meyki-aw pyay. Sawk homkwe hmo uron me kankoum ankin, hmo uron mokwe homkwe yaprue liy ma-nan sakei, seyr liy hakan ousne sa-ousne.   
\c 3  
\s1 Enekwei pariawey hom non  
\p
\v 1 Hunkwe senkin kwa nonkway, Enekwei Pariawey-ar hiy lousne ohriar lwak ankin, low kraiar hom lousne-sa-ousne ey. \x * \xo 3:1 \xt 1 Ti 4:1\x*  
\v 2 Unsaney homkwe hmo owh arian o, meinowon o, seme uron-pi ko-ar lwak ey, seyr nak-me-heyr yor o, aryar yor o, me piap-ma-piap yor o, ipey-aio mo ok me lonuayk sisape yor o, seme mon nakyas ey. Seyr homkwe uwrsa mo hiymon yor me kar ley lopa, seyr God so yor yaprue me me-puar ey.  
\v 3 Uron-pi ko-ar yor hokwe hmo mon lwak lopa. Homkwe wayh-wayh me awnie awnie-aw lira ey, seyr ok-piap-ok o, aw lono yor o, seme mon nakyas ey. Homkwe homkiaw-ayay hiy-anok anok lopa, seyr yor yaprue me kar ley lopa.  
\v 4 Homkwe wayh-wayh me wei kow mon piapay ey, seyr homkwe hmo yor me nanpanan popriy yor lopa lwak ey, seyr homkwe hmo uru arian me lowk nakie yor kokwe woki nuw-wak ey, seyr homkwe hmo owh arian me kar mon ey yor kokwe uron-pi ko-ar nuw-wak ey, sawk God se lira muar ey.  
\v 5 Homkwe God se ma nan wayr mokwe owhi nonaw pyay ey, sawk homkwe God so ok-ihey ko krai se me-puar ey. Hunkwe unsaney senkin sohom mo meiaw mon kwa lwak. \x * \xo 3:5 \xt Mat 7:15,21; Ta 1:16\x*   
\p
\v 6 Uwr senkin sohom mo har homkwe, unsaney har mo a mon seme lyawriy, sa, lorok kraiay yor lopa me lokin lor-a-lor swakakar e. Sa somokwe, hmo yor piap-araw arian homkiaw ma lyay low-a-low hom non, seyr hmo lira way yor piap-araw, homkiaw ma mon anyan ha hom non.  
\v 7 Sa somokwe nonkway senkin senkin me nuw-mon sorasor lokruok, sawk homkwe okar-ok ke liy lonok ley.  
\v 8 Uwrsa somokwe, paraw uwr prueysyar, Janes, Jambres leys hoh Moses se ma me-puar, God so ok-ar-ok kokwe senkin me-puar. Uwrsa sohom mo mawkworom mokwe po mon piapay, seyr hmo nan kiykiy-ay yor mokwe po makuayk. \x * \xo 3:8 \xt Kis 7:11\x*  
\v 9 Sawk hmo yor somokwe enekwei meipey liy nuw-mon wayr ley, payhokuaw, uwrsa sohom mo lowk la-pa-la yor kokwe uwrsa lowpwarowp mo inour mon kokwe kumay-ar lwak ey, paraw, Janes, Jambres leys so lawk-lawk yor, kumay-ar ma lousne senkin.   
\s1 God so ok-ar-ok mon-aw lanio  
\p
\v 10 Sawk ok lowpwarowp, ha ma hiymon sorasor o, hano liwak yor o, hano makwey ko o, hano nan kiykiy-ay yor o, hano meinkiowp-aw lwak yor o, hano uron-pi ko-ar yor o, hano lorok kraiay wayr yor o, somokwe hunkwe nonkway nuw-wak.  
\v 11 Seyr hane yerki piap-araw non ma mon yorpayor o, hano owh, aw ma nak-ok o, weynpaweyn lowpwarowp hane ma mon, om Antiok mon, Aikoniam mon, Listra mon, hunkwe papo nonkway. Hanekwe yerki piap-araw-ar non nuw-mon piap-ma-piap, sawk hakwe nuw-orok kraiay. Seyr hane kokwe Hakamay hiykiaw hiy-mon, yor lowpwarowp piap-araw sohom mo ouon ko hokwe. \x * \xo 3:11 \xt Ap 13:14-52; 14:5,8-20\x*  
\v 12 Suw senkin, uwrsa Jisas Krais so meyki posokwaw pyay e mon e, hme kokwe yor piap-araw non mon yorpayor ey. \x * \xo 3:12 \xt Mat 16:24; Jon 15:20; Ap 14:22\x*  
\v 13 Sawk uwr piap-araw o, uwr okrei-yor ma meio o, sohom mo yor pokon piap eyn ma lwak mokwe, omok kokwe piap-araw-ar nuw-wak ey. Uwrsa somokwe uwrsa kraiar me me-loior kow ey, sawk hme nian kokwe ma-sahre me-loior kow ey.  
\v 14 Sawk hunkwe okar-ok, hne ma hiymon sorasor mon-aw kwa lanio, seyr ok sokwe-aw kwa nan kiykiy-ay. Payhokuaw, uwr, hne ok sokwe ma hiymon sorasor mokwe, hunkwe nonkway nuw-wak.  
\v 15 Seyr Mamey Pekneyweys, hwon ney nopre ma lwak non ma nonkway kokwe kwa nanpanan. Mamey sokukwe hne mawkhow ihey-ar, God so huonok prosue yerki mon lanio ey se liy kow, Krais Jisas se ma nan kiykiy-ay so kueir nonaw.  
\v 16 God so ok, mamey porih lowpwarowp mon ma lwak mokwe, God hiykiaw losia-hakar kawk ousne, mey ipey-ar senkin me meio e: Uwrsa me hiy-mon sorasor ey, uwrsa mo yor piap me me-kupaku ey, okrei-ok me hiy-mon popriy ey, seyr uwrsa me God so yor luw-luw-aw me hiy-me anok-anok ey. \x * \xo 3:16 \xt Ro 15:4\x*  
\v 17 Suw uwr, God so mey me ma meio kow hiykwe, kyai lowpwarowp, mey lowpwarowp yaprue me nak-meio ey me liy lonok.   
\c 4  
\s1 God so ok ke kwa mesor kraiay  
\p
\v 1 God so inour mon o, Krais Jisas, uwrsa su ma lwayr, seyr uwrsa ma lokrue ha, seme lira anon anon ey so inour mon o, seyr hyo Wayr-hre yier hiy lousne hrahra ey se hokuaw, hakwe hne senkin kiy-nuw-me kraipakrai:  
\v 2 Hunkwe God so ok ke kwa mesor kraiay, mo enekwei-ar lwak hi, mo enekwei-ar lwak lopa hi. Hunkwe uwrsa me kwa me-weih-a-weih, seyr kwa me-kupaku, seyr kwa hiy-me kraipakrai, seyr uwrsa me kokwe meinkiowp-aw lwak yor nonaw kwa hiymon sorasor.  
\v 3 Payhokuaw, enekwei, uwrsa hom okar-ok luw-luw-aw ke me-puar ey hokwe ya le a. Sawk uwrsa homkwe hmo lira way yor piap-araw arian mo meyki pyay ey, seyr homkwe hiymon sorasor uwr kraiar kraiar me seme huonokyaw, ok, hom ma nan koukou-ay me mesor kow e. \x * \xo 4:3 \xt 1 Ti 4:1\x*  
\v 4 Homkwe okar-ok kokwe meyki kankoum sow hain ey, sawk okpey paraw-uh me lonuayk ey.  
\v 5 Enekwei enekwei mokwe, hunkwe hunkiaw-ayay kwa hiy-anok anok, seyr low mokwe kwa lorok kraiay wayr. Seyr ok-ihey ke lanio mesor kow uwr so mey ke kwa meio, seyr hno mey lowpwarowp mokwe God so mey-uwr-ar se hieyn-aw kwa meio lowpway.   
\p
\v 6 Hunkwe senkin sehe lon e, payhokuaw, enekwei hane lokin kwor nwaws prawk ey hokwe po kiy-ousne, hano enekwei ki ehe lokriy hain ey hokwe papo lousne. \x * \xo 4:6 \xt Fl 2:17\x*  
\v 7 Hakwe aw yaprue ke po lono, seyr ha ki erey ma sau hokwe, hakwe papo sau sopsop-ay lowpway, seyr ha God se ma nan kiykiy-ay hokwe, papo nuw-nakruok kraipakrai. \x * \xo 4:7 \xt 1 Ti 6:12\x*  
\v 8 Enkin ohokwe, God hiy hane luw-luw-aw ok ma me so makwey-kokway kokwe hane po lyay kow naruok. Makwey-kokway sokukwe, Hakamay, Lira-anon-anon-uwr luw-luw-aw hiykwe hane hyo enekwei-ar sok kow ey. Seyr hane-aw korey, sawk uwrsa lowpwarowp hye lira e ma nan koukou-ay me o. \x * \xo 4:8 \xt 1 Ko 9:24-25\x*   
\s1 Pol so hiy-anok-anok ok pariawey  
\p
\v 9 Hunkwe hano owh mon kwa saw-ok-nonanon ne.  
\v 10 Payhokuaw, Demas hiykwe, yor ki ko me ma lira way me hokuaw kokwe, hane lokriy hain nok, Tesalonaika mon ley. Kresens hiykwe Galesia mon ley, Taitus hiykwe Dalmesia mon ley.  
\v 11 Sawk hane nion kokwe Luk hiykwaw non-wak. Hunkwe Mak se kwa huonok, hiykwe hne nion ka non-e, payhokuaw, hiykwe hane liy hiymon, mey ha ma meio okwe. \x * \xo 4:11 \xt Ap 15:37-39; 2 Ko 8:23; Kol 4:14\x*  
\v 12 Hakwe Tikikus se kokwe Efesus mon me-ha.  
\v 13 Hwon le ankin, hano saket, ha Karpus so a, Troas mon ma lwak mon ma lokriy hain sokwe kwa lway nok kow, seyr hano buk seyn, kwa nake. Sawk buk, ayay-ohi mon ma mey me uron peie lorionay o. \x * \xo 4:13 \xt Ap 20:6\x*   
\p
\v 14 Aleksander, omeme bras non ma meio uwr hiykwe hane kokwe yor piap kraiar me po mon yorpayor, sawk Hakamay hiykwe hye ya ma-sahre nakway a, yor hiykiaw ma mon sohok ko liyliy-aw. \x * \xo 4:14 \xt Sng 62:12; Ro 2:6; 1 Ti 1:20\x*  
\v 15 Hwon seyn, uwr sohokwe iray-iray non kwa lwak, payhokuaw, hiykwe ok, hrom ma mesor mokwe awnie awnie-aw lira.   
\p
\v 16 Hano kot peyr-mon-ar ko kokwe hakiaw-ayay hiy-orok, sawk uwr prueyn hane nion non-orok pa. Uwr lowpwarowp homkwe hane lokriy hain. God hiykwe uwr sohom mo hakan yor mokwe aw-mar lopa ka lwak.  
\v 17 Sawk hane nion kokwe Hakamay hiykiaw non-orok, seyr hanekwe God hiykiaw hiymon, sa hakwe ok-ihey kokwe sehe mesor sopay-sopay, uwr-kayn irweyk lowpwarowp hom lonuayk ey hokwe. Seyr hane kokwe laion so woki ko hokwe, God hiykiaw kahya prosue.  
\v 18 Suw senkin, Hakamay hiykwe hane kyai piap-araw mo iha ko me kahya prosue nok, hyo Wayr-hre-yier nonkumey ko mon hiynuw-ey ihey ok. Panpaniowni hokwe hyo mon senkinaw-aw ka lwak peyow peyow. Okar.   
\s1 Me-ihey ok pariawey-ar  
\p
\v 19 Hunkwe hano me-ihey-ok mokwe Prisila, Akwila leys se o, Onesiforus so uwrku o, seme kwa mesor kow. \x * \xo 4:19 \xt Ap 18:2; 2 Ti 1:16-17\x*  
\v 20 Erastus hiykwe Korin mon-aw lwak, seyr hakwe Trofimus se kokwe Miletus mon-aw lokriy hain, payhokuaw, hiykwe peik non. \x * \xo 4:20 \xt Ap 19:22; 20:4; Ro 16:23\x*  
\v 21 Hunkwe hano owh mon kokwe kwa saw-ok-nonanon ne, payhokuaw weyp-nono enekwei hokwe pau ohriar lwak. Yubulus o, Pudens o, Linus o, Klodia o, seyr kristen lowpwarowp o, homkwe hne me-ihey-ok me-ha.   
\p
\v 22 Hakamay hiykwe hno niohney se nion ka non-wak, seyr God so maym kow yor kokwe hmo lowpwarowp me nion ka non-wak.