\id 2JN  - Abau NT [aau] -Papua New Guinea 2006 (DBL -2014) 
\h 2 JON 
\toc1 Jon so mamey meyki ko hok non 
\toc2 2 Jon 
\toc3 2 Jn 
\mt1 2 JON  
\mt2 Jon so mamey meyki ko hok non  
\ip \bd Meyamey uwr hokwe:\bd* Aposel Jon.  
\ip \bd Yier hiy ma lwayr meyamey hokwe:\bd* Nonkway lwak pey, yier Efesus mon lwak se po meyamey pak e.  
\ip \bd Enekwei hiy ma meyamey hokwe:\bd* Hiykwe enekwei Yia 85-96 so ompok sok meyamey, Jisas hiy ma lokrue so meyki.  
\ip \bd Ok mamey mon ma lwak mokwe senkin:\bd* Mamey haraw-ney okukwe Jon hiykwe kristen-sa prueyn ke mey-a-mey kow. Sawk Baibel nonkway-uwr kraiar homkwe senkin nan, kristen-sa sokukwe sios kamon ke me-memeir kow. Jon hiykwe sios sohok ko sa-u-ar kokwe nak-mey pa, payhokuaw, hiykwe Rom mo yor sios me ma mon piap-ay seme hok. Jon hiykwe kristen hom homkiaw-ayay uron-pi ko-ar lwak e hiy-me kraipakrai, seyr hiykwe hmekwe okrei hiymon-sorasor-uwr me nak-ira e hiy-me-kupaku.  
\ip \bd Mamey ohok ko uron ipey-ar hokwe senkin:\bd* Kristen homkwe senkin nonkway e, okrei hiymon-sorasor-uwr kraiar homkwe papo lousne-sa-ousne. Hromkwe seme nonkway e, uwr senkin hom sios mon lousne ankin, kristen hromkwe liy lorok kraipakrai mon sous-a-sous huon. Sawk kristen homkwe homkiaw-ayay uron-pi ko-ar lwak yor nonaw kwa lorok.  
\c 1  
\p
\v 1 Mamey okukwe ha sios-makwey-uwr hiy mey. Hakwe mamey okukwe sa, God hiy ma lahan iaup o, hoko ney-om o, hme mey kow ha.\f + \fr 1:1 \ft Nonkway-uwr har homkwe senkin nan ohruw-a, sa-ok ma me sokukwe sa-arar korey. Sokukwe sios se me-memeir. Hoko ney-ok ma me somokwe sios-uwrsa me me.\f* Hakwe hme kokwe ok-ar-ok ke hokuaw uron-pi ko-ar nuw-wak. Hakwaw korey, sawk uwrsa lowpwarowp okar-ok ke ma nonkway hom seyn, hme uron-pi ko-ar lwak,  
\v 2 payhokuaw, okar-ok hokwe hromo mon lwayr, seyr hreme nion senkin-aw non-wayr ey.   
\p
\v 3 Aio God o, Aio so Ney, Jisas Krais o, hohkwe hremekwe maym o, uron lowk yor o, liwak marowhway yor o, seme ka kow. Weynpaweyn somokwe okar-ok non o, uron-pi ko-ar yor non o, hreme nion ka lwak.   
\s1 Okar-ok o, uron-pi ko-ar o  
\p
\v 4 Hakwe kar sehe ley, payhokuaw, hakwe senkin nonkway, hno ney har homkwe ok-ar-ok ko meyki pyay, Aio hiy hreme ma me-kupaku senkin. \x * \xo 1:4 \xt 3 Jn 1:3\x*  
\v 5 Sa ihey-ar akwa, hakwe hne senkin mesopok, hromkwe wayh-wayh me uron-pi ko-ar lwak e. Hakwe hnekwe me-kupaku-ok iwon ke mey kow pey. Me-kupaku-ok sokukwe hrom peyr-ar ma lonok pie hok non. \x * \xo 1:5 \xt 1 Jn 2:7\x*  
\v 6 Uron-pi ko-ar ha ma me sokukwe senkin, hromkwe God so me-kupaku-ok me lonuayk me pyay e. Homkiaw peyr-ar po lonuayk pie, hyo me-kupaku-ok kokwe senkin, homkwe uron-pi ko-ar lwak yor nonaw lanio e.   
\p
\v 7 Okrei-uwr kraiar homkwe kipay lowpwarowp mon po ley neyney. Unsaney somokwe ok-ar-ok, Jisas Krais hiy iwar mo owhi non ma nake hokwe, me-kumay sakon kawk pey. Unsaney senkin somokwe okrei-uwr, seyr okrei-krais. \x * \xo 1:7 \xt 1 Jn 4:1-3\x*  
\v 8 Homkwe iray-iray non kwa lwak, sa mey, hom ma meio lonok me mon swakreik ha lak. Sawk God hiykwe hmekwe, pie ka ma-sahre kow prusow.  
\v 9 Unsaney, Krais so hiymon sorasor me ma lokriy hain, sawk yirour-irour non ma nakey homkwe, God se nion non-wak pey. Unsaney Krais so hiymon sorasor mon-aw ma lwak somokwe, Aio o, Ney o, hehe nion non-wak.  
\v 10 Unsaney prueyn hno owh mon ma le hiykwe, hiymon sorasor-ok sokwe nake pa lwak ankin, hunkwe unsaney sohokwe hno a mon peie me-huonok yawriy o, seyr kar peie me ey huon o.  
\v 11 Hunkwe uwr senkin sehe kar nonaw me-huonok yawriy ankin, hunkwe hyo yor piap-araw me lon-mon wayh-wayh.   
\s1 Ok pariawey hom non  
\p
\v 12 Hakwe hmekwe ok kraiar mey kow e mon, sawk hakwe mamey non mey e mon pey. Hakwe hmekwe hakiaw le ira e mon, seyr ine sawk-sawk non-ohruw e mon, hromo kar ley yor ke nak-mon prusow lowpway ey hokwe.   
\p
\v 13 Hno ine, God hiy ma lahan iaup ko ney homkwe, hne me-ihey-ok me-ha.